Home » ᑮᓇᐅᔭᓕᕆᓂᖅ ᐱᕈᖅᑎᑦᑎᓇᓱᐊᕐᓂᕐᓗ

ᑮᓇᐅᔭᓕᕆᓂᖅ ᐱᕈᖅᑎᑦᑎᓇᓱᐊᕐᓂᕐᓗ

ᑮᓇᐅᔭᓂᒃ ᐊᑐᕆᐊᖃᕐᓇᓲᖑᕗᖅ ᐊᑐᓂ ᐊᑐᖅᑕᐅᔪᓂ ᐅᔭᕋᖕᓂᐊᒐᒃᓴᙳᑐᐃᓐᓇᕆᐊᖃᖅᑐᒥᒃ ᐱᕙᓪᓕᐊᑎᑦᑎᓂᕐᒥ ᐅᔭᕋᖕᓂᐊᕐᕕᐅᑐᐃᓐᓇᕆᐊᓕᖕᒥᒃ.

ᐅᔭᕋᒃᓯᐅᖅᑎ ᑮᓇᐅᔭᖃᕆᐊᖃᖅᐳᖅ ᐅᔭᕋᒃᓯᐅᕈᓐᓇᐅᑎᒧᑦ ᐊᑐᕆᐊᖃᖅᑕᖏᓐᓄᓪᓗ ᕿᓂᕆᐊᕐᓂᕐᒧᑦ.

ᐅᔭᕋᖕᓂᐊᒐᒃᓴᓄᑦ ᓇᖕᒥᓂᖅᓱᕈᓐᓇᐅᑎ ᐊᑐᕈᓐᓇᕐᓂᕋᖅᑑᓐᓇᕈᒪᓗᒍ ᒐᕙᒪᐃᑦ ᓄᓇᖁᑎᖃᖅᑎᐅᔪᑦ ᐅᔭᕋᖕᓂᐊᒐᒃᓴᖅᓯᐅᑎᓂᒃ ᕿᓂᖅᑎᐅᔪᓂᔨᓗ ᐊᑭᑐᒍᓱᒃᑎᑦᑎᓗᐊᕌᓗᓕᓪᓗᐊᙱᓚᑦ ᓇᖕᒥᓂᖅᓱᕈᓐᓇᐅᑎᖃᐃᓐᓇᕋᓱᖕᓂᐊᕐᓗᑎᒃ. ᑕᐃᒪᐃᙱᑉᐸᑦ ᓇᖕᒥᓂᖅᓱᕈᓐᓇᐅᑎᒋᔭᖅ ᐊᑐᕈᓐᓃᕋᔭᖅᐳᖅ, ᒐᕙᒪᒃᑯᓐᓄᓪᓗ ᐅᑎᑐᐃᓐᓇᓕᕐᒥᓗᓂ ᐊᓯᖔᖏᓐᓄᑦ ᐱᔭᐅᔪᓐᓇᖅᓯᓗᓂ.

ᓄᓇᓄᕗᑦ ᑐᙵᕕᒃᑯᑦ ᑭᒡᒐᖅᑐᖅᑎᒋᔭᖓᑦ ᐅᔭᕋᖕᓂᐊᒐᒃᓴᓂᒃ ᕿᓂᖅᑕᖃᕐᓂᕐᒧᑦ ᑲᑐᔾᔨᖃᑎᒌᖏᑕ ᑲᑎᙵᓂᕐᔪᐊᕆᔭᖓᓂ ᕚᓐᑰᕙᒥ. ᑖᓐᓇ ᐊᕐᕌᒍᑕᒫᑦ ᑲᑎᓐᓂᕆᔭᐅᕙᒃᑐᖅ ᐅᐸᒃᑕᐅᓲᖑᕗᖅ ᑮᓇᐅᔾᔭᒃᐹᓪᓕᕈᑎᒃᓴᐅᓇᔭᖅᑐᒃᓴᖅᓯᐅᖅᑎᓂᑦ ᓇᑭᑐᐃᓐᓇᑦᑎᐊᖅ ᓄᓇᕐᔪᐊᕐᒥ. ᐊᔾᔨᙳᐊᖅ: ᓄᓇᑦᓯᐊᑉ ᓄᓇᕘᓪᓗ ᐅᔭᕋᖕᓂᐊᖅᑐᓕᕆᔨᑦ ᑲᑐᔾᔨᖃᑎᒌᖓᑦ

ᒥᑭᑦᑐᑕᐅᓂᖅᓴᐃᑦ ᐅᔭᕋᖕᓂᐊᖅᑎᐅᕙᒃᑐᑦ – ᑕᒪᒃᑯᐊ ᕿᓂᖅᑎᐅᕙᒃᑲᓗᐊᖅᖢᑎᒃ ᐅᔭᕋᖕᓂᐊᒐᒃᓴᖅᑕᖃᕆᐊᒃᓴᖓᓂᒃ ᑭᓯᐊᓂ ᓇᖕᒥᓂᖁᑎᖃᕋᑎᒃ ᐅᔭᕋᖕᓂᐊᕐᕕᒋᔭᓂᒃ – ᑮᓇᔭᑎᒍᑦ ᐃᑲᔪᖅᑕᐅᕐᔪᐊᕐᓂᖅᓴᐅᔭᕆᐊᖃᒡᒍᕗᑦ. ᑕᐃᒪᓐᓇᑎᒋ ᕿᓂᖅᓴᓕᕋᖓᒥᒃ ᕿᓂᖅᑎᐅᔪᑦ ᐅᑭᐅᖅᑕᖅᑑᑉ ᑎᑭᑕᕐᓂᙱᓐᓂᕆᔭᖏᓐᓂ ᐊᑭᑐᒃᓂᖅᓴᐅᔾᔪᔾᔨᓚᕿᓯᒪᕙᖕᒪᑕ. ᐆᒃᑑᑎᒋᓗᒍ, ᑲᐃᕗᕈᑕᐅᓂᐊᖅᑐᑦ ᖁᓕᒥᒎᓕᒃᑯᑦ ᑭᓯᐊᓂ ᕿᓂᕐᕕᐅᓂᐊᖅᑐᓕᐊᕈᔾᔭᐅᔭᕆᐊᖃᖅᐸᖕᒪᑕ. ᖃᑯᑎᒃᑯᑦ ᑲᒻᐸᓂᑎᒎᕋᑎᒃ ᐃᓄᑐᐃᓐᓇᐅᓪᓗᑎᒃ ᐊᑭᓕᖅᓱᐃᓇᓱᒍᒪᓲᖑᕗᑦ ᑭᓯᐊᓂ ᔭᒐᐃᑐᐃᓐᓇᖅᑲᖦᖤᕆᐊᒃᓵᖅᓯᒪᕐᔪᐊᕐᓇᖅᐳᖅ. ᒥᑭᑦᑐᑕᐅᓂᖅᓴᐃᑦ ᐅᔭᕋᖕᓂᐊᖅᑎᐅᕙᒃᑐᑦ ᑮᓇᔭᐅᒐᓲᑎᖃᕈᒪᓂᖅᓴᐅᒡᒍᕗᑦ ᑭᒃᑯᑐᐃᓐᓇᕐᓄᑦ ᐱᖃᖃᑕᐅᔾᔪᑎᓂᒃ ᓂᐅᕕᖅᑕᐅᑎᑦᑎᕙᒃᖢᑎᒃ. ᑕᐃᒪᐃᓕᐅᕐᓂᒃᑯᑦ ᔭᒐᐃᑐᐃᓐᓇᕆᐊᖃᕐᓂᕆᔭᖅ ᐃᕐᓂᒃᖠᓕᖅᑕᐅᓯᒪᔪᓐᓇᕐᓂᖅᓴᐅᔪᓐᓇᖅᐳᖅ ᑭᒃᑐᐃᓐᓇᐃᑦ ᑮᓇᐅᔾᔭᒐᓲᑎᖃᕈᒪᔪᑦ ᓂᐅᕕᕈᓐᓇᖅᖢᑎᒃ ᐱᖃᖃᑕᐅᔾᔪᑎᓂᒃ.

ᐊᓯᐊᒍᖔᖅᑕᐅᖅ ᑮᓇᐅᔭᖅᑕᖃᕈᓐᓇᕈᑎᑕᖃᕆᕗᖅ ᐊᖏᔫᑎᓂᑦ ᑭᓱᑐᐃᓐᓇᕐᓄᑦ ᑲᒻᐸᓂᐅᔪᓂᑦ ᑮᓇᐅᔭᓕᖅᑎᑕᐅᓂᒃᑯᑦ. ᐃᓛᓐᓂᑦ, ᐊᖏᔫᑕᐅᓂᖅᓴᑦ ᑲᒻᒪᐸᓂᐅᔪᑦ ᒥᑭᑦᑐᑕᐅᓂᖅᓴᑦ ᕿᓂᕋᓲᑎᖏᓐᓂᒃ ᐊᑭᓖᕙᒃᐳᑦ ᑭᖑᓂᖓᒍᑦ ᑮᓇᐅᔭᖅᑖᕈᓐᓇᕈᑎᖃᓛᕈᒪᒧᑦ. ᐃᒪᐃᑐᐃᓐᓇᕆᐊᖃᕆᓪᓗᑎᒡᓘᓐᓃᑦ, ᐊᖏᔫᑕᐅᓂᖅᓴᑦ ᑲᒻᒪᐸᓂᐅᔪᑦ ᒥᑭᑦᑐᑕᐅᓂᖅᓴᑦ ᐱᖃᖃᑕᐅᔾᔪᑎᓕᒫᖏᓐᓂᒃ ᓇᖕᒥᓂᖃᕈᑎᖏᓐᓂᒡᓘᓐᓃᑦ ᓂᐅᕕᐊᖃᕈᒪᓗᑎᒃ.
ᐊᑐᕐᓂᓕᕐᔪᐊᖑᖕᒥᔪᖅᑕᐅᖅ ᐅᔭᕋᖕᓂᐊᒐᒃᓴᖅᑕᖃᕐᓂᐊᕐᓂᕐᒧᑦ ᐃᓕᐅᕈᓯᐅᔪᖅ ᑕᐃᔭᕙᒃᖢᓂ ᐃᓯᖅᑕᖃᑐᐃᓐᓇᕈᓐᓇᕐᓂᖅ, ᑕᒪᑐᒨᓇ ᐅᔭᕋᖕᓂᐊᒐᒃᓴᖅᓯᐅᕈᒪᔪᒥᒡᓘᓐᓃᑦ ᕿᓂᖅᑕᖃᕋᓱᒍᒪᔪᒥᒡᓘᓐᓃᑦ ᑭᒃᑯᑐᐃᓐᓇᐃᑦ ᓄᓇᖓᓐᓄᐊᕈᓐᓇᖅᑎᑕᐅᓪᓗᓂ ᐅᔭᕋᖕᓂᐊᒐᒃᓴᖅᓯᐅᕈᒪᒧᑦ.

ᐅᑭᐅᖅᑕᖅᑐᕐᒥ, ᑲᖐᓇᖅᑑᑎᒋᔭᐅᕗᖅ ᐃᒻᒪᖄ 30ᐳᓴᐸᓗᓪᓗᐊᖅ ᐅᔭᕋᖕᓂᐊᕋᓱᒍᒪᓂᕐᒧᑦ ᐊᑐᒐᒃᓴᐅᙱᑦᑕᕆᐊᖓ. ᐊᑐᒐᒃᓴᐅᙱᑦᑐᑦ ᐃᓚᖏᑦ ᒪᑯᐊᖑᕗᑦ ᐱᒻᒪᑐᒃᓯᕝᕕᐅᔪᒃ, ᓄᓇᑖᕐᓂᒃᑯᑦ ᓄᓇᖁᑎᒋᐅᔪᑦ ᐊᒻᒪ ᐊᑐᖅᑕᐅᔪᒫᓂᐊᕐᓂᕐᒧᑦ ᐱᕙᒌᔭᕈᑕᐅᓯᒪᔪᑦ. ᓄᓇᒧᐊᑐᐃᓐᓇᕈᓐᓇᙱᔾᔪᑎᑦ ᕿᓂᖅᑕᖃᕐᓂᐊᕋᓱᖕᓂᕐᒧᑦ ᑲᑐᖓᕚᓪᓕᕈᑕᐅᕗᖅ.