Home » ᑲᔪᓯᑦᑎᐊᖅᕈᓐᓇᖅᑎᒋᓂᖅ

ᑲᔪᓯᑦᑎᐊᖅᕈᓐᓇᖅᑎᒋᓂᖅ

ᑲᔪᓯᑦᑎᐊᖅᕈᓐᓇᖅᑎᒋᓂᖓᓂᒃ ᖃᐅᔨᓴᕐᓂᖅ ᑲᒻᐸᓂᓄᑦ ᓴᖅᑭᑕᐅᔭᕆᐊᖃᓲᖑᕗᑦ ᓇᓗᓇᐃᖅᑕᐅᓂᖓᓄᑦ ᐅᔭᕋᖕᓂᐊᕐᑕᐅᔪᒃᓴᖅ ᑮᓇᐅᔭᓕᐅᕐᕕᐅᔪᓐᓇᕐᒪᖔᑦ ᐅᔭᕋᖕᓂᐊᕐᕕᙳᖅᑎᑕᐅᓇᔭᖅᐸᑦ.

ᑕᒪᓐᓇ ᖃᐅᔨᓴᖅᑐᒻᒪᕆᐅᓂᖅ ᑲᑎᑎᑉᐸᖏᑦ ᖃᐅᔨᒪᔭᓗᒃᑖᕐᒥᓂᒃ ᐅᔭᕋᖕᓂᐊᖅᑕᐅᔪᒃᓴᕐᒥᒃ ᓇᓂᓯᒪᔭᒥᓂᒃ – ᐊᖏᑎᒋᒥᖓ ᐱᐅᑎᒋᓂᖓᓗ (ᐆᒃᑐᖅᑕᐅᕙᒃᖢᑎᒃ “ᐱᐅᑎᒋᓂᖓᒍᑦ” ᐅᔭᕋᖕᓂᐊᒐᒃᓴᓕᒡᔪᐊᑉ), ᓴᕕᕋᔭᖃᖅᑎᒋᓂᖓ (ᖃᓄᑎᒋ ᐲᔭᖅᑕᐅᔪᓐᓇᕐᒪᖔᑦ ᓴᕕᕋᔭᒃ), ᒫᓐᓇᐅᔪᖅ ᓯᕗᓂᒃᓴᒥᓗ ᐊᑭᒋᔭᐅᕙᒃᑐᑦ ᓂᐅᕕᐊᒃᓴᖅ, ᓂᐅᕕᐊᒃᓴᓪᓘᓐᓃᑦ, ᐅᔭᕋᖕᓂᐊᖅᑕᐅᓂᐊᖅᑐᑦ, ᐃᖅᑲᓇᐃᔭᖅᑎᖃᕐᓂᕐᒨᖓᔪᑦ ᐱᖁᑎᓪᓗ ᐊᑭᖏᑦ, ᐊᖏᑎᒋᓂᖓ ᖃᓄᐃᑦᑑᑕᐅᓂᖓᓗ ᐅᔭᕋᖕᓂᐊᕐᕕᓕᐊᕆᔭᐅᔪᒪᔫᑉ, ᐊᕙᑎᐅᑉ ᓄᓇᓕᖕᒥᐅᓪᓗ ᐃᓱᒪᒋᔭᐅᓂᖏᑦ, ᐊᒻᒪᓗ ᒥᒃᓴᐅᓴᒃᑕᐅᓪᓗᑎᒃ ᐅᔭᕋᖕᓂᐊᕐᕕᐅᑉ ᐊᐅᓚᐃᓐᓇᕐᓂᐊᕐᓂᖓᓄᑦ ᐊᑭᖓ. ᐊᓯᖏᑦ ᖃᐅᔨᓴᖅᑕᐅᓂᐊᕐᒥᔪᑦ ᐃᓚᒋᔭᐅᓪᓗᑎᒃ ᓄᓇᕐᔪᐊᕐᒥ ᓂᐅᕕᐊᒃᓴᕆᔭᐅᕙᖕᓂᖏᑦ ᓂᐅᕕᖅᑕᐅᕙᖕᓂᖏᓪᓗ, ᒪᓕᒐᖃᕐᕕᐅᔫᑉ ᒐᕙᒪᖓᑕ ᐃᖏᕐᕋᑦᑎᐊᖅᑎᒋᓂᖓ, ᐱᔭᕆᖃᑐᑎᒋᓂᖏᑦ ᒪᓕᒃᑕᐅᔭᕆᐊᓖᑦ, ᐃᖅᑲᓇᐃᔭᖅᑎᒃᓴᖅᑕᖃᖅᑎᒋᓂᖓ, ᐃᑲᔪᖅᓱᖅᑕᐅᓂᖅ ᓄᓇᓕᖕᒧᑦ. ᑖᒃᑯᐊ ᑕᒪᐃᑎᒎᖓᑎᑕᐅᓗᑎᒃ ᐅᓂᒃᑲᐅᓯᕆᔭᐅᔪᓐᓇᖅᑐᑦ ᐊᑦᑕᕐᓇᕈᓐᓇᒃᓂᐃᓐᓄᑦ ᐱᕝᕕᐅᔪᓐᓇᕐᓂᖏᓐᓄᓪᓗ.

ᐊᐱᖅᑯᑎᓪᓗᐊᑕᐅᕗᑦ ᑭᐅᔾᔪᑎᓪᓗᐊᑕᐅᓪᓗᑎᒡᓗ ᑲᔪᓯᑦᑎᐊᖅᕈᓐᓇᖅᑎᒋᓂᕐᒥᒃ ᖃᐅᔨᓴᕐᓂᕐᒥ ᖃᔅᓯᑐᓛᕐᒪᖔᑦ ᓴᓇᔭᕋᒃᓴᖅ ᐊᐅᓚᑎᑦᑕᕆᐊᒃᓴᕐᓗ ᖃᑯᒍᓗ ᐅᑎᕐᕕᐅᔪᓐᓇᖅᓯᓛᕐᒪᖔᑦ. ᐅᑎᕐᕕᐅᓂᐅᕗᖅ ᐊᑯᓂᐅᑎᒋᓂᖓᑕ ᐅᔭᕋᖕᓂᐊᕐᕕᖕᒥᑦ ᑮᓇᐅᔭᓕᐊᕆᔭᐅᔪᑦ ᐊᑭᓖᕌᓂᖕᓂᖓ ᓯᕗᓪᓕᕐᒥ ᑮᓇᐅᔭᖅᑐᕈᑕᐅᓚᐅᖅᑐᓂᒃ, ᐃᓚᒋᔭᐅᓪᓗᑎᒃ ᕿᓂᕐᓂᖅ, ᐊᕙᑎᒥᒃ ᖃᐅᔨᓴᕐᓂᖅ ᐊᒻᒪᓗ ᓴᓇᓂᖅ, ᐱᕈᖅᑎᑦᑎᓇᓱᐊᕐᓂᖅ.

ᓇᓗᓇᐃᖅᑕᐅᓇᓱᒃᖢᓂ ᐊᖏᑎᒋᓂᐊ ᐱᐅᑎᒋᓂᖓᓗ, ᐆᒃᓯᑖᕈᑎᒋᔭᐅᔪᑦ ᕿᒥᕐᕈᔭᐅᕐᔪᐊᖅᐸᒃᐳᖅ ᖃᓄᑎᒋ ᐅᔭᕋᖕᓂᐊᒐᒃᓴᖅᑕᖃᖅᑎᒋᑐᐃᓐᓇᕆᐊᖃᕐᒪᖔᑦ. ᑖᓐᓇ ᑕᐃᔭᖅ ᐱᕕᒋᔭᒃᓴᖅ, ᐱᕕᒋᔭᒃᓴᕐᒧᑦ ᖃᐅᔨᒃᑲᐃᔾᔪᑎᑦ ᓇᓗᓇᐃᖅᓯᒪᕙᒃᐳᑦ ᐆᒃᑐᕋᖅᑕᐅᓯᒪᔭᕆᐊᒃᓴᖅ, ᑲᖐᓇᕈᑎᖃᕆᐊᒃᓴᕐᓘᓐᓃᑦ ᐃᑰᑕᖅᓯᓂᒃᑯᑦ ᐆᒃᓯᑖᕆᔾᔪᑎᓂᙶᖅᓯᒪᔪᓂᑦ. ᐊᒻᒪᒃᑲᓐᓂᖅ ᐅᔭᕋᖕᓂᐊᖅᑕᐅᔪᒃᓴᒃᑲᓐᑐᐃᓐᓇᕆᐊᓕᒃ – ᐅᔭᕋᖕᓂᐊᕈᒥᓇᖅᑐᖅᑕᓕᒃ ᐱᕕᒋᓴᒃᓴᙳᖅᑎᑕᐅᑐᐃᓐᓇᕆᐊᓕᒃ ᐆᒃᓯᑖᖅᑕᐅᒃᑲᓐᓂᖅᓯᒪᓕᕈᓂ – ᓇᓗᓇᐃᖅᓯᒪᖃᓯᐅᔾᔭᐅᕙᒃᑭᕗᖅ.

ᑲᔪᓯᑦᑎᐊᕈᓐᓇᖅᑎᒋᓂᕐᒥᒃ ᖃᐅᔨᕙᓪᓕᐊᓂᖅ ᐊᑭᑐᓄᖅ, ᑲᒻᐸᓃᓪᓗ ᐊᑭᓖᕙᒃᖢᑎᒃ ᑕᔭᖏᓐᓃᑦᑐᓂᒃ ᒥᓕᐊᓐ ᑖᓚᓂᒃ ᐊᒃᑐᐊᔪᓄᑦ ᐊᑭᖃᖅᑐᓂᒃ. ᐅᔭᕋᖕᓂᐊᕐᕕᖕᒥᑦ ᑮᓇᐅᔭᖅᑖᔾᔮᙱᓚᑦ ᐅᔭᕋᖕᓂᐊᓪᓚᕆᓕᓚᐅᖅᑎᓐᓇᑎᒃ, ᑕᐃᒪᐃᒃᑳᖓᓘᓐᓃᑦ, ᐊᕐᕌᒍᓄᑦ ᓯᕗᓪᓕᕐᓄᑦ ᑮᓇᐅᔾᔭᒍᑕᐅᔫᒐᓗᐊᑦ ᐊᑭᓖᔾᔪᑕᐅᓕᑐᐃᓐᓇᖅᐸᖕᒪᑕ ᐊᑭᓕᒃᓴᖅᑖᖑᓚᐅᖅᑐᓄᑦ ᐅᔭᕋᖕᓂᐊᕐᕕᓕᐅᖅᐸᓪᓕᐊᑎᓪᓗᒋᑦ.

ᑲᔪᓯᑦᑎᐊᖅᕈᓐᓇᖅᑎᒋᓂᒃᓴᕐᒥᒃ ᖃᐅᔨᓴᕈᑕᐅᔪᑦ ᓇᓗᓇᕈᓐᓃᖅᑎᑦᑎᒃᐸᑕ ᐅᔭᕋᖕᓂᐊᕐᕕ ᑮᓇᐅᔾᔭᒍᑕᐅᔪᓐᓇᕋᔭᕐᒪᖔᑦ, ᐱᓕᕆᐊᒃᓴᖅ ᑲᔪᓯᑎᑕᐅᔪᓐᓇᖅᑐᖅ ᒪᓕᒋᐊᖃᕐᓂᕐᒧᑦ ᐱᔪᓐᓇᖅᑎᑕᐅᓂᕐᒧᓪᓗ ᐊᑐᖅᑕᐅᔭᕆᐊᓕᖕᓂᒃ. ᐃᓱᒪᖅᓲᑎᖃᖅᐳᑦ ᑮᓇᐅᔭᖃᖅᑎᑦᑎᔨᐅᔪᑦ ᑮᓇᐅᔭᖅᑕᖃᖅᑎᑦᑎᓂᐊᕐᒪᖔᕐᒥᓂᒃ ᐅᔭᕋᖕᓂᐊᕐᕕᓕᐅᕐᓂᐊᕐᓗᑎᒃ. ᐅᑭᐅᖅᑕᖅᑐᕐᒥ ᐅᔭᕋᖕᓂᐊᕐᕕᒃᓴᐃᑦ 1 ᐱᓕᐊᓐ ᑖᓚᖏᓐᓄᑦ ᑎᑭᐅᒪᓗᒍ ᐅᖓᑖᓄᓪᓘᓐᓃᑦ ᓴᓇᔭᐅᓇᓱᖕᓂᖏᓐᓄᑦ.