Home » ᓄᓇᐅᑉ ᖄᖓᓂ ᐅᔭᕋᖕᓂᐊᕐᓂᖅ

ᓄᓇᐅᑉ ᖄᖓᓂ ᐅᔭᕋᖕᓂᐊᕐᓂᖅ

ᓄᓇᐅᑉ ᖄᖓᓂ ᐅᔭᕋᖕᓂᐊᕐᓂᖅ ᖄᖓᓃᓐᓇᒥ ᐊᑭᑭᓛᖑᓲᖑᕗᖅ ᐅᔭᕋᖕᓂᐊᕋᓱᒋᐊᒃᓴᖅ. ᑕᐃᒪᐃᑉᐳᖅ ᐅᔭᖅᑲᑦ ᐅᖓᓯᒃᑐᒧᑦ ᖁᒻᒧᐊᒃᑎᑕᐅᓇᓱᒋᐊᖃᓲᖑᙱᒻᒪᑕ ᐃᒃᑕᕆᒋᔭᐅᕙᙱᖦᖢᑎᒃ, ᐊᑐᖅᑕᐅᔪᑦ ᐊᖏᓂᖅᓴᐅᔪᓐᓇᓲᖑᕗᑦ ᓄᓇᐅᑉ ᐃᓗᐊᓂ ᐅᔭᕋᖕᓂᐊᕐᕕᐅᕙᒃᑐᓂᑦ, ᐊᑭᑐᓂᖅᓴᓂᒡᓗ ᐊᑐᕆᐊᖃᙱᑦᑐᓐᓇᖅᖢᑎᒃ ᓲᕐᓗ ᐊᓂᖅᓵᕈᓐᓇᐅᑎᑦ, ᑐᓴᐅᒪᖃᑎᒌᒍᑎᑦ, ᐊᓯᖏᓪᓗ ᓄᓇᐅᑉ ᐃᓗᐊᓂ ᐅᔭᕋᖕᓂᐊᕐᕕᐅᕙᒃᑐᓂ ᐊᑐᕆᐊᖃᕐᓇᖅᑐᑎᑐᑦ.

ᓄᓇᐅᑉ ᖄᖓᓂ ᐅᔭᕋᖕᓂᐊᕐᕕᑦ ᐋᖅᑭᐅᒪᓂᖃᖅᐳᑦ ᓴᓇᔭᐅᓯᒪᓂᖃᖅᐳᓪᓗ ᐃᑰᑕᖅᑕᐅᔪᓐᓇᖅᑎᑦᑎᓇᓱᒃᖢᑎᒃ ᖃᒐᖅᑎᑕᐅᑎᑦᑎᓇᓱᒃᖢᑎᒡᓗ ᐅᔭᕋᖕᓂᐊᖅᑕᐅᔪᒃᓴᒥᒃ ᐅᔭᖅᑲᒥᒡᓗ ᐊᕙᑕᖏᖅᓯᓯᒪᔪᒥᒃ. ᐋᖅᑭᐅᒪᓂᕆᔭᖅ ᓯᕕᖓᓂᕆᔭᕐᒥᒃ ᐊᑦᑕᕐᓇᙱᑦᑐᓐᓇᖅᑎᑦᑎᕗᖅ. ᐅᑭᐅᖅᑕᖅᑐᕐᒥ, ᐅᔭᕋᖕᓂᒐᒃᓴᑦ ᐊᕙᑕᖏᖅᑕᐅᓯᓂᖃᕈᒥᓇᖅᐳᖅ ᖃᐃᖅᓱᒑᕐᒥᒃ, ᑕᒪᓐᓇᓗ ᓯᖃᓕᑐᐃᓐᓇᔭᓐᓇᓂ.

ᑎᑭᐅᑎᓇᓱᒡᓗᓂ ᐅᔭᕋᖕᓂᐊᖅᑕᒃᓴᒧᑦ, ᖄᒥᐅᑕᕆᔭᖅ (ᐅᔭᖅᑲᑦ, ᐃᔾᔪᖅ, ᒥᖃᐱᒡᓗ ᐅᔭᕋᖕᓂᐊᖅᑕᒃᓴᑉ ᖄᖓᓃᑦᑐᖅ) ᐲᔭᖅᑕᐅᖅᑳᕆᐊᖃᖅᐳᖅ.


ᐃᑲᑎ ᑕᐃᒪᓐ ᐅᔭᕋᖕᓂᐊᕐᕕᒃ ᐊᒥᓱᓂᒃ ᓄᓇᐅᑉ ᖄᖓᓂ ᐅᔭᕋᖕᓂᐊᕐᕕᖃᐅᖅᐳᑦ, ᑖᒃᑯᓇᓂᓗ ᑯᐊᓚ, ᖁᓛᓂ, ᐹᓐᑕ, ᕿᑎᐊᓂ, ᑯᐊᓚᐅᑉ ᐅᐊᖕᓇᖓᓂ (ᒥᑭᓐᓂᖅᓴᖅ ᐅᔭᕋᖕᓂᐊᕐᕕᒃ ᓄᓇᐅᑉ ᖄᖓᓂ ᐊᑯᓐᓂᖓᓂ ᑯᐊᓚᐅᑉ ᐹᓐᑕᐅᓪᓗ), ᐊᒻᒪᓗ ᐱᐅᑑᔅ (ᖄᒥᕝᕕᐅᑎᑕᐅᓚᐅᖅᑐᖅ ᐅᔭᕋᖕᓂᐊᒐᒃᓴᖃᕈᓐᓃᖅᑕᐅᒐᒥ 2009ᒥ), ᑕᓕᖅᐱᒃᖠᖅ.
ᐊᔾᔨᙳᐊᖅ: ᑐᒥᓂᐊᓐ ᑕᐃᒪᓐᓂᒃ ᐅᔭᕋᖕᓂᐊᕐᕕᒃ

ᓄᓇᐅᑉ ᖄᖓᓂ ᐅᔭᕋᖕᓂᐊᕐᕕᑦ ᐊᖕᒪᓗᕐᓗᑎᐅᔪᓐᓇᖅᐳᑦ, ᐃᑲᑎ ᐅᔭᕋᖕᓂᐊᕐᕕᐅᑉ ᐊᔾᔨᙳᐊᖓᑐᑦ, ᐅᓚᒥᕐᓂᖅᓴᐅᔪᓐᓇᖅᖢᑎᒡᓘᓐᓃᑦ ᖁᕝᕙᓯᓕᕇᒃᑐᓂᒡᓗ ᖃᐃᕋᓐᓂᖃᖅᑎᓯᒪᓪᓗᑎᒃ. ᐅᔭᕋᖕᓂᐊᖅᑕᐅᔪᒃᓴᒧᑦ ᐊᖅᑯᑎᑕᖃᐅᕐᓗᓂ. ᐊᒃᑎᒋᓂᖓ ᐃᓗᑐᑎᒋᓂᖓᓗ ᑕᐃᒪᐃᑎᑕᐅᔾᔪᑎᖃᖅᐳᖅ ᖃᓄᑎᒋ ᐊᑐᖅᑕᐅᔾᔮᙱᑦᑐᒥᒃ ᐅᔭᕋᒃᑕᖃᖅᑎᒋᖕᒪᖔᑦ ᐅᔭᕋᖕᓂᐊᖅᑕᐅᓇᓱᒃᑐᒧᑦ ᑎᑭᐅᑎᓐᓇᖅᓯᓚᐅᖅᑎᓐᓇᒍ. ᖃᕆᕋᓐᓂᓕᐊᕆᓯᒪᔭᖅ ᓯᕗᓪᓕᖅᐹᖅ ᐊᑑᑎᖃᕐᔪᐊᖅᐳᖅ ᑭᖑᓂᖓᓃᑦᑐᑦ ᖁᖁᖓᓂᖅᓴᐅᓂᐊᕐᒪᑕ. ᖃᓄᑎᒋ ᐊᑐᔾᔮᙱᑦᑐᒥᒃ ᐅᔭᕋᒃᑕᖃᕐᓂᕆᔭᖓ ᐅᔭᕋᖕᓂᐊᑕᐅᔪᒃᓴᒥᑦ ᔅᑐᕆᑉ ᕋᐃᓯᐅᖑᓂᕋᖅᑕᐅᕗᖅ.

ᐅᑭᐅᖅᑕᖅᑐᕐᒥ, ᓄᓇᐅᑉ ᖄᖓᒍᑦ ᐅᔭᕋᖕᓂᐊᕐᓂᖅ ᐃᖕᒥᒃᑯᑦ ᐊᔪᕐᓇᖅᑐᖅᓯᐅᕈᑎᖃᖅᐸᒃᐳᑦ. ᐆᒃᑑᑎᒋᓗᒍ, ᑕᐃᐊᕕᒃ ᑕᐃᒪᓐᑕᕐᕕᐊᓂ, ᑕᐃᒪᓐᓂᒃ ᐅᔭᕋᖕᓂᐊᒐᒃᓴᐃᑦ, ᑕᐃᔭᐅᓪᓗᑎᒃ ᑭᒻᐳᓚᐃᑦ ᑐᐊᑦᑑᑎᑦ ᐃᓄᒃᑐᑦ ᑕᐃᒪᓐ ᐃᓂᒋᒐᔪᒃᑖᓚᔭᐅᓪᓗᓂ (ᓄᓇᐅᑉ ᐃᓗᐊᓂᑦ ᐆᓇᖅᑐᕐᔪᐊᖅ ᑕᐃᒪᓐᓂᒃ ᓄᓇᐅᑉ ᖄᖓᓄᐊᖅᑎᕆᓂᑯ 55 ᒥᓕᐊᓐ ᐊᕐᕌᒎᓕᖅᐳᑦ), ᐃᒃᑲᑦᑐᒦᖦᖢᑎᒃ ᑕᓯᕐᒥ ᓛᒃ ᑎ ᒍᕌᒥ. ᐊᑦᑕᕐᓇᙱᓪᓗᒍ ᓄᓇᐅᑉ ᖄᖓᒍᑦ ᐅᔭᕋᖕᓂᐊᕐᕕᒋᓇᓱᖕᓂᐊᕐᓗᒍ ᐃᒻᒥᑦᑕᐃᓕᔾᔪᑎᓕᐅᕐᕕᐅᓚᐅᖅᐳᖅ ᐳᖅᑐᔫᓪᓗᒍ ᐊᕙᓗᓪᓗᒍ.

ᐊᑭᑭᑎᑦᑎᕚᓪᓕᕈᑕᐅᕐᔪᐊᕐᓂᖃᖅᐳᑦ ᓄᓇᐅᑉ ᖄᖓᓂ ᐅᔭᕋᖕᓂᐊᕆᐊᒃᓴᖅ ᐱᔾᔪᑎᒋᓪᓗᒍ ᐊᑑᑎᖃᕐᔪᐊᕐᓂᖅᓴᓂᒃ ᐊᖏᔫᑎᓂᒃ ᐅᔭᕋᖕᓂᐊᕈᑎᖃᕈᓐᓇᕈᑕᐅᓂᖅᓴᐅᓂᖅ. ᐅᔭᕋᖕᓂᐊᖅᑕᖃᑲᐅᖅᑐᕐᓂᖅᓴᐅᓂᖅ ᐊᒻᒪ ᐅᔭᕋᖕᓂᐊᒐᒃᓴᑦᑎᐊᕙᐅᙱᓐᓂᖅᓴᐅᒐᓗᐊᓂᒃ ᐅᔭᕋᖕᓂᐊᖅᑕᖃᕐᓇᖅᓯᕙᒃᑭᓪᓗᓂ. ᑮᓇᐅᔭᐅᑎᑖᕐᓂᖅᓴᐅᓐᓇᖅᐳᕐᓗ ᐅᔭᕋᖕᓂᐊᕐᕕᒃ ᓄᓇᐅᑉ ᐃᓗᐊᓄᐊᖅᐸᓪᓕᐊᓂᐊᖅᑎᓪᓗᒍ ᐃᓗᕙᓯᖕᓂᖅᓴᐅᔪᓂᒃ ᐅᔭᕋᖕᓂᐊᒐᒃᓴᖅᓯᓇᓱᖕᓂᐊᖅᓪᓗᒍ.

ᓄᓇᐅᑉ ᖄᖓᓂ ᐅᔭᕋᖕᓂᐊᕐᓂᐅᑉ ᐃᓕᐅᕐᕕᐅᓂᖓᑕ ᑲᐃᕕᓐᓂᖓ ᐃᓚᖃᖅᐳᖅ ᐅᔭᕋᖕᓂᐊᒐᒃᓴᒥᒃ ᐊᑐᔾᔮᙱᑦᑐᒥᒡᓗ ᐅᔭᖅᑲᒥᒃ ᐃᑰᑕᖅᓯᓂᖅ, ᐃᑰᑕᕐᕕᐅᔪᑦ ᖄᖅᑕᔫᓕᖅᑕᐅᓪᓗᑎᒃ, ᖄᖅᑎᕆᓂᖅ, ᐅᔭᕋᖕᓂᐊᖅᑕᖅ ᐅᓯᓕᖅᓱᖅᑕᐅᓪᓗᓂ ᐊᑐᖅᑐᒃᓴᙳᖅᑎᑕᐅᕕᒋᓂᐊᖅᑖᓄᓪᓗ ᐋᖦᖢᒍ, ᐅᔭᖅᑲᑦ ᐊᑐᖅᑕᐅᔾᔮᙱᑦᑐᑦ ᐅᓯᓕᖅᓲᔾᔭᐅᒐᒥᒃ ᐋᑕᐅᓪᓗᑎᒡᓗ ᐊᑐᖅᑕᐅᔾᔮᙱᑦᑐᑦ ᑲᑎᖅᓱᖅᑕᐅᕝᕕᒋᔭᖓᓄᑦ. ᖃᑯᑎᒃᑯᑦ ᐃᑰᑕᕐᓂᖅ ᖄᒐᐃᓂᕐᓗ ᐊᑐᖅᑕᐅᙱᑦᑐᓐᓇᖅᐸᒃᐴᒃ ᐅᔭᕋᖕᓂᐊᒐᒃᓴᖅ ᐊᒡᒐᒃᑕᐅᑐᐃᓐᓇᕐᓗᓂᐅᔪᓐᓇᕋᒥ. ᓄᓇᐅᑉ ᖄᖓᒍᑦ ᐅᔭᕋᖕᓂᐊᕐᕕᒋᔭᖅ ᐃᓗᑦᑐᖅᐸᓪᓕᐊᓪᓗ ᖁᖁᕙᓪᓕᐊᑐᐃᓐᓇᕈᐊᖕᒪᑦ ᐲᔭᐃᔾᔪᑎᓅᖅᑕᐅᔪᓐᓇᐃᓪᓕᕙᓪᓕᐊᕙᒃᖢᓂ.