ᑐᑦᑕᕐᕕᒃ » ᐅᑭᐅᒃᑯᑦ ᐊᖅᑯᑎ

ᐅᑭᐅᒃᑯᑦ ᐊᖅᑯᑎ

ᑎᑉᐱᑦᒥᑦ ᑲᓐᑐᐃᑐᒧᑦ ᐅᑭᐅᒃᑯᑦ ᐊᖅᑯᑎᑦ, ᐊᕐᕌᒍᑕᒫᑦ ᓴᓇᔭᐅᕙᒃᑐᖅ, ᑲᑐᔾᔭᐅᓯᒪᓪᓗᓂ ᐱᓕᕆᐊᕆᔭᐅᕙᒃᑐᖅ ᓄᓇᑦᓯᐊᕐᒥ ᐱᖓᓲᔪᓄᑦ ᑕᐃᒪᓐᓄᑦ ᐅᔭᕋᖕᓂᐊᕐᕕᖕᓄᑦ. ᐊᖅᑯᑕᐅᔪᖅ ᑲᑎᙵᑎᑦᑎᔪᖅ ᑕᓯᕐᓂᒃ ᖁᐊᖑᔪᓂᒃ ᐊᒻᒪᓗ ᐃᑳᖅᓯᓂᕐᓂᒃ. ᐊᔾᔨᙳᐊᖁᑎᒋᔭᖅ: ᑕᐃᐊᕕᒃ ᑕᐃᒪᓐᓂᐊᖅᑎᑦ/TCWRJV

ᐃᖏᕐᕋᔪᓕᕆᔨᔾᔪᓯᑦ ᑭᒡᓕᖃᖅᐳᑦ ᐅᑭᐅᖅᑕᖅᑐᕐᒥ. ᓄᓇᑦᓯᐊᖅ ᓴᓇᔭᐅᓯᒪᓗᐊᙱᑦᑐᒥᒃ ᐅᖓᓯᒃᑐᒧᑦ ᐊᖁᑦᑐᓐᓇᐅᑎᖃᖅᑐᖅ. ᑎᓴᒪᓂᒃ, ᐃᓛᓐᓂᒃᑯᑦ ᑕᓪᓕᒪᓂᒃ, ᑕᖅᑭᕐᓂᒃ ᒪᑲᓐᓯᐅᑉ ᑰᖓᒍᑦ ᐃᑳᕆᐊᖃᓲᖑᔪᑦ ᑎᓴᒪᓂᑦ ᑕᓪᓕᒪᓂᑦ ᑕᖅᑭᕐᓂᒃ ᐅᑭᐅᖅᑕᖅᑐᕐᒥ ᑕᕆᐅᒃᑯᑦ ᐅᓯᕝᕕᐅᔪᓐᓇᓲᖑᔪᑦ. ᑲᒻᐸᓂᐅᔪᖅ ᐅᔭᕋᖕᓂᐊᕐᕕᓕᐅᙱᑉᐸᑦ ᖃᓂᑦᑐᒥᒃ ᑕᐃᒃᑯᓄᖓ ᐃᖏᕐᕋᕝᕕᐅᕙᒃᑐᓄᑦ, ᐅᑭᐅᒃᑯᑦ ᐊᖅᑯᑕᐅᓇᔭᖅᑐᒥᒃ ᓴᓇᔭᕆᐊᖃᕋᔭᖅᑐᖅ ᓄᓇᖁᑎᒥᓄᑦ. ᖃᖓᓲᒃᑰᕐᓂᐅᑉ ᐊᓯᐊᒍᑦ, ᐊᑭᑐᔪᐊᓘᓪᓗᓂ ᑲᖓᑕᓲᒃᑰᕐᓂᖅ, ᐊᓯᐊᒎᕐᕕᒃᓴᖃᙱᑦᑐᖅ ᐅᓯᔭᐅᑎᑦᑎᔭᕆᐊᒃᓴᖅ ᐊᖏᔪᓂᒃ, ᐅᖏᙱᑦᑐᓂᒃ ᓴᓇᕐᕈᑎᓂᒃ ᐅᖅᓱᐊᓗᐊᓘᖃᑦᑕᖅᑐᓂᒡᓘᓐᓃᑦ ᐊᓯᖏᓐᓂᒡᓗ ᐃᓗᐃᑦᑑᓈᕆᔭᐅᓪᓗᑎᒃ ᐱᖁᑎᓂᒃ ᐱᔭᕆᐊᖃᖅᐸᒃᑕᖏᓐᓂᒃ.

ᑲᒻᐸᓂᐅᔪᖅ ᐅᔭᕋᖕᓂᐊᕐᕕᓕᐅᕐᓂᐊᓪᓚᕆᓕᕌᖓᑦ, ᐄᐳᓪ 1 ᐱᒻᒪᕆᐅᓛᖑᓕᓲᖑᕗᖅ ᐅᓪᓘᔪᓂᑦ ᐃᑲᕐᕋᖅᓯᐅᑎᒥ. ᓯᑯᒃᑯᑦ ᐊᖅᑯᑏᑦ ᐊᑐᖅᑕᐅᖏᓐᓇᕈᓐᓇᓲᖑᙱᒻᒪᑕ ᐅᖓᑖᓂ, ᐅᖁᒪᐃᑦᑐᓪᓗ ᓴᓇᕐᕈᑎᖏᑦ, ᐅᖅᓱᐊᖏᑦ ᐊᓯᓪᓘᓐᓃᑦ ᐃᓗᐃᑦᑑᓪᓗᑎᒃ ᐱᖁᑎᖏᑦ ᐅᔭᕋᖕᓂᐊᕐᕕᖕᒦᑉᐸᒌᙱᒃᑯᖏᑦ, ᐊᑐᖅᑕᐅᔪᒃᓴᖏᑦ ᐅᖓᕙᒋᐊᖅᑎᑕᐅᓪᓗᑎᒃ ᐊᕐᕌᒎᓛᖅᑐᒧᑦ.

ᐅᑭᐅᒃᑯᑦ ᐊᖅᑯᑎᑦ ᑐᑭᖃᖅᐳᖅ ᐅᑭᐅᒃᑯᑦ ᓯᓚ ᖃᓄᕐᔪᐊᖅᑎᓪᓗᒍ ᐃᖏᕐᕋᔪᖃᓲᖑᔪᖅ ᓄᓇᒃᑰᕈᑎᓂᒃ, ᓂᒡᓕᓇᕐᓂᖓ 40ᖏdᓐᓃᒐᔪᒃᖢᓂ.

ᐊᑎᕆᔭᐅᔪᖅ ᐅᑭᐅᖅᑕᖅᑐᕐᒥ ᓯᑯᒃᑯᑦ ᐊᖅᑯᑎᓄᑦ ᐊᒃᑐᐊᔭᐅᑎᒐᔪᒃᑐᖅ ᔮᓐ ᑕᓂᓴᓐ. ᓯᑯᒃᑯᑦ ᐊᖅᑯᑎᓕᐅᖃᑦᑕᓕᓚᐅᖅᓯᒪᔪᖅ ᐅᑭᐅᖅ ᑕᖅᑐᕐᒥ ᐱᓕᕆᐊᒃᓴᓄᑦ 1960ᒥ ᐸᐃᐅᔅ ᐃᖏᕐᕋᔪᓕᕆᔨᒃᑯᑦ ᑲᒻᐸᓂᒋᓪᓗᓂᐅᒃ. ᑕᐃᔅᓱᒪᓂᐅᓚᐅᖅᑐᖅ ᒎᓗᒧᑦ ᐅᔭᕋᖕᓂᐊᕐᕖᑦ ᕿᓂᓚᐅᕐᒪᑕ ᐊᑭᑭᓐᓂᖅᓴᒥᒃ ᖃᖓᑕᓲᒃᑯᑦ ᐅᓯᔭᐅᕙᖕᓂᖏᓐᓂᑦ ᐱᖁᑎᑦ ᓴᓇᕐᕈᑏᓪᓗ. ᑕᓂᓴᓐ ᐊᖅᑯᑎᒧᓪᓗ ᐃᖅᑲᓇᐃᔭᖅᑎᖏᑦ ᐊᖅᑯᑎᓕᐅᖅᐸᓚᐅᖅᑐᑦ ᑖᖅᑐᒻᒪᕆᐅᑎᓪᓗᒍ, ᓂᒡᓕᓇᖅᑐᒻᒪᕆᐅᑎᓪᓗᒍᓗ ᓄᓇᕐᔪᐊᕐᒥ ᐊᔪᖅᓴᕐᓇᓛᖑᖃᑕᐅᔪᓂ ᐅᖓᓯᓛᖑᖃᑕᐅᔪᓂᓗ ᐅᑭᐅᖅᑕᖅᑐᕐᒥ.

ᑕᐃᔅᓱᒪᓂ ᐊᖅᑯᑎᓕᐅᕐᓂᖅ ᐊᑦᑕᕐᓇᕐᓂᖃᖅᑎᒋᕙᓚᐅᖅᑐᖅ, ᐊᑦᑕᕐᓇᕐᓂᖅᑕᖃᙱᓐᓂᖅᓴᐅᒃᐸᑦ, ᐊᖅᑯᑎᒃᑯᑦ ᐅᓯᓂᕐᒥᑦ. ᓴᓇᔭᐅᓯᒪᒻᒪᕆᙱᑦᑐᓂᒃ ᓴᓇᕐᕈᑎᓂᒃ ᐊᑐᖅᖢᑎᒃ, ᐃᖅᑲᓇᐃᔭᖅᑎᑦ ᓴᓗᒻᒪᖅᓴᐃᕙᓚᐅᖅᑐᑦ ᖄᒥᑦᑎᕙᒃᖢᑎᒡᓗ ᐊᖅᑯᑎᓂᒃ – ᐊᑯᓂᐅᓂᖃᕋᔪᒃᑭᓪᓗᓂ ᐃᒪᕐᒥᑦ ᓴᓇᕐᕈᑎᓂᒃ ᐅᓯᓂᖅ ᐊᖅᑯᑎᓕᐅᕐᓂᐅᑉ ᐊᑯᓂᐅᑎᒋᓂᖓᓄᑦ.

ᐃᖅᑲᓇᐃᔭᖅᑎᑦ ᖄᒥᑦᑎᕝᕕᒋᔭᓖᑦ ᑎᑉᐱᑦᒥᑦ ᑲᓐᑐᐃᑐᒧᑦ ᐅᑭᐅᒃᑯᑦ ᐊᖅᑯᑎᖓᓂᒃ ᐅᖓᓯᒃᑎᒋᓂᖃᖅᖢᑎ 360 ᑭᓛᒥᑕᓂᒃ ᔭᓗᓇᐃᕝ ᐃᖕᒍᕋᒻ ᐱᓱᕝᕕᐊᑕ ᐅᐊᖕᓂᖓᓂᑦ, ᓄᓇᑦᓯᐊᕐᒥ, ᑕᐃᒪᓐᓄᑦ ᐅᔭᕋᖕᓂᐊᕐᕕᖕᒧᑦ ᓚᒃ ᑐ ᒍᕌᒧᑦ. ᐊᔾᔨᙳᐊᖅ ᑕᐃᐊᕕᒃ ᑕᐃᒪᓐᓂᐊᖅᑎᑦ/TCWRJV

ᐅᓪᓗᒥᐅᔪᖅ, ᓯᑯᒃᑯᑦ ᐊᖅᑯᑎᓕᐅᕐᓂᖅ ᓄᑖᙳᖅᐸᓪᓕᐊᔪᒻᒪᕆᖕᓂᒃ ᐊᑐᕐᓇᑦᑎᐊᖅᑐᖅ. ᐊᖕᒪᓗᖅᑐᓂᒃ ᖃᐅᔨᔾᔪᑎᓂᒃ ᐊᒻᒪᓗ ᑕᒻᒪᕇᒃᑯᑎᓂᒃ ᐊᑐᖅᖢᑎᒃ, ᐊᖅᑯᑎᓕᐅᖅᑎᑦ ᓯᑰᑉ ᓵᓐᓂᖏᓐᓂᒃ ᓇᓂᓯᑲᐅᖅᑐᕈᓐᓇᕐᓂᖅᓴᐅᓕᖅᑐᑦ ᑕᒻᒪᖅᓯᒪᙱᓐᓂᖅᓴᐅᓕᕐᓗᑎᒃ. ᑕᐃᒫᒃ ᓴᓇᑦᑎᐊᕐᓇᕐᓂᖅᓴᐅᑐᐃᓐᓇᙱᖦᖢᓂ, ᐊᑦᑕᕐᓇᙱᓐᓂᖅᓴᓂᒃ ᐊᖅᑯᑎᓕᐅᕐᓇᓲᖑᒋᕗᖅ.

ᓯᑯᒃᑯᑦ ᐊᖅᑯᑎᑦ ᐅᓪᓗᒥᐅᓕᖅᑐᖅ ᐊᑐᖅᑕᐅᕙᒃᑐᑦ ᐱᖁᓯᖅᓯᔾᔪᑎᓪᓗᐊᑕᕆᔭᐅᓪᓗᑎᒃ ᑕᐃᒪᓐᓄᑦ ᐅᔭᕋᖕᓂᐊᕐᕕᖕᓄᑦ ᓄᓇᑦᓯᐊᕐᒥ ᓄᓇᕗᒻᒥᓗ. ᐅᖅᓱᐊᓗᒃ, ᐊᒃᓴᓗᐊᑦ, ᓴᓇᔾᔪᑎᑦ ᐊᓯᖏᓪᓗ ᐅᓯᔭᐅᕙᒃᑐᑦ ᖁᐊᖑᔪᓂ ᑕᓯᕐᓂ ᐊᑯᓂᐅᙱᑦᑑᒐᓗᐊᖅ ᖁᓕᓂ ᐱᓇᓱᐊᕈᓯᐅᕙᒃᑐᓂ ᐊᕐᕌᒍᑕᒫᑦ.

ᐃᓕᒃᑲᓐᓂᕆᑦ ᐅᕙᙵᑦ.