ᑐᑦᑕᕐᕕᒃ » ᐅᔭᕋᖕᓂᐊᒐᒃᓴᕐᓄᑦ ᐱᖁᔭᖅ

ᐅᔭᕋᖕᓂᐊᒐᒃᓴᕐᓄᑦ ᐱᖁᔭᖅ

ᐱᔾᔪᑎᒋᓪᓗᒍ ᓇᖕᒥᓂᖅᓱᕐᓂᖅ, ᓅᑕᐅᓪᓗᑎᒃ ᑲᒪᒋᔭᐅᔭᕆᐊᓖᑦ ᑭᒃᑯᑐᐃᓐᓇᐃᑦ ᓄᓇᖏᓐᓄᑦ, ᐃᒪᖏᓐᓄᑦ ᐊᒻᒪᓗ ᓄᓇᒥᙶᖅᑐᓂᒃ ᐊᐅᓚᑦᑎᓂᕐᒥᒃ ᓄᓇᑦᓯᐊᑉ ᒐᕙᒪᖓᓂᑦ ᒐᕙᒪᑐᖃᒃᑯᓐᓂᑦ, ᓄᓇᑦᓯᐊᑉ ᒐᕙᒪᖓ ᐋᓯᔾᔨᖅᑎᑦᑎᔪᑦ ᐅᔭᕋᖕᓂᐊᒐᒃᓴᕐᒥᒃ ᐱᖁᔭᕐᒥᒃ. ᑕᒪᑐᒧᖓ ᖃᐅᔨᒋᐊᕐᕕᒋᔭᖃᕐᓂᖅ ᐃᓚᒋᔭᐅᕗᖅ. ᐊᔾᔨᙳᐊᖅ: ᓄᓇᑦᓯᐊᕐᒥ ᓄᓇᕗᒻᒥᓗ ᐅᔭᕋᖕᓂᐊᖅᑐᓕᕆᔨᑦ ᑲᑐᔾᔨᖃᑎᒌᖏᑦ

ᓇᖕᒥᓂᖅᓱᕐᓂᖅ ᐃᓚᒋᓪᓗᒍ, ᓅᑕᐅᓂᖏᑦ ᑲᒪᒋᔭᐅᕙᒃᑐᑦ ᐅᑭᐅᖅᑕᖅᑐᕐᒥ ᐊᕕᒃᑐᖅᓯᒪᔪᒧᑦ ᒐᕙᒪᐅᔪᒧᑦ ᒐᕙᒪᑐᖃᒃᑯᓐᓂᖅ, ᓄᓇᑦᓯᐊᑉ ᒐᕙᒪᖓ ᒫᓐᓇᐅᔪᖅ ᓄᑖᙳᖅᑎᑦᑎᕙᓪᓕᐊᔪᑦ ᐅᔭᕋᖕᓂᐊᒐᒃᓴᕐᓄᑦ ᐱᖁᔭᕐᒥᒃ.

ᓄᓇᑦᓯᐊᕐᒥ ᐅᔭᕋᖕᓂᐊᕐᓂᖅ ᕿᓂᕐᓂᕐᓗ ᒫᓐᓇᐅᔪᖅ ᐊᐅᓚᑕᐅᔪᑦ ᓄᓇᑦᓯᐊᕐᒥ ᐅᔭᕋᖕᓂᐊᕐᓂᕐᒧᑦ ᒪᓕᒃᑕᐅᔭᕆᐊᓕᖕᓂᒃ. ᑖᓐᓇ ᐃᔾᔪᐊᖅᑕᐅᓯᒪᔪᖅ ᒐᕙᒪᑐᖃᒃᑯᓐᓂᑦ ᒪᓕᒐᖅᑖᕆᔭᐅᓚᐅᖅᑐᒥᒃ ᓇᖕᒥᓂᖅᓱᖅᐸᓪᓕᐊᑎᓪᓗᒋᑦ.

ᑖᒃᑯᐊ ᒪᓕᒃᑕᐅᔭᕆᐊᓖᑦ ᐊᑐᓕᖅᑎᑕᐅᓛᖅᑐᑦ ᐊᓯᔾᔨᖅᑎᑕᐅᖃᑦᑕᓛᖅᖢᑎᒡᓗ ᒪᓕᒃᖢᒍ ᒪᓕᒐᒃᓴᙳᖅᑎᑕᐅᓇᓱᒃᑐᖅ, ᐋᖅᑭᒃᓱᖅᑕᐅᓛᖅᖢᓂᓗ ᐊᐅᓚᑕᐅᓂᐊᕐᒪᑕ:
•ᐅᔭᕋᖕᓂᐊᒐᒃᓴᓄᑦ ᐱᔪᓐᓇᐅᑎᑦ
•ᐃᑲᔫᑎᒃᓴᑦ ᓄᓇᓕᖕᒥᐅᓄᑦ (ᓲᕐᓗ ᓂᖏᖅᑕᐅᔪᑦ)
•ᐅᓂᒃᑳᓕᐅᕐᓂᖅ ᐅᔭᕋᖕᓂᐊᒐᒃᓴᑦ ᖃᓄᐃᑦᑑᑕᐅᓂᖏᓐᓄᑦ ᓇᓃᓐᓂᖏᓐᓄᓪᓗ
•ᐊᑐᖅᑕᐅᔭᕆᐊᓖᑦ ᓇᓂᔭᖃᕐᓂᕋᐃᒍᑎᑦ ᐊᒻᒪ ᐸᐸᑦᑏᓐᓇᕐᓂᕐᒧᑦ ᐅᔭᕋᖕᓂᐊᒐᒃᓴᖃᕐᕕᒋᔭᕐᒧᑦ

ᐅᔭᕋᖕᓂᐊᒐᒃᓴᕐᓄᑦ ᐱᖁᔭᖅ ᐊᓯᔾᔨᖅᑎᑦᑎᓛᙱᑦᑐᖅ ᐃᓇᖏᖅᓯᓛᕋᓂᓗ ᓇᓕᐊᖕᓂᑐᐃᓐᓇᖅ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᕐᒥ ᐊᕕᒃᓯᒪᔪᓪᓘᓐᓃᑦ ᒪᓕᒐᖏᓐᓂᒃ ᐊᑐᖅᑕᐅᔭᕆᐊᓕᖕᓂᒡᓗ ᐊᐅᓚᑎᑦᑎᕙᒌᖅᑐᓂᒃ ᐅᔭᕋᖕᓂᐊᕐᓂᕐᒥᒃ ᕿᓂᕐᓂᕐᒥᒡᓗ ᓄᓇᑦᓯᐊᕐᒥ.

ᐅᔭᕋᖕᓂᐊᒐᒃᓴᕐᓄᑦ ᐱᖁᔭᖅ ᐊᒃᑐᐊᔾᔮᙱᑦᑐᖅ ᑎᑭᐅᑎᔭᐅᔭᕆᐊᓕᖕᓂᒃ ᐊᑐᖅᑕᐅᔭᕆᐊᓕᖕᓂᒡᓗ ᐋᖅᑭᒃᓯᒪᕙᒌᖅᑐᓂᒃ ᒪᑲᓐᓯ ᕚᓕᐅᑉ ᓄᓇᒥᙶᖅᑐᓂᒃ ᐊᐅᓚᑦᑎᓂᕐᒧᑦ ᐱᖁᔭᕐᒥ.

2018 ᐱᒋᐊᓕᓵᖅᑎᓪᓗᒍ, ᓄᓇᑦᓯᐊᑉ ᒐᕙᒪᖓ ᓴᖅᑭᑦᑎᓚᐅᖅᑐᖅ ᓇᓗᓇᐃᖅᑕᐅᑦᑎᐊᖅᓯᒪᔪᓂᒃ ᑭᒃᑯᑐᐃᓐᓇᐃᑦ ᐅᖃᖅᓯᒪᔭᖏᓐᓂᑦ. ᐅᓇ ᓇᕿᓪᓗᒍ ᖃᐅᔨᒋᐊᒃᑲᓐᓂᕈᒪᒍᕕᑦ.