ᑐᑦᑕᕐᕕᒃ » ᐊᑐᖅᓯᔪᓐᓇᐅᑎᑖᖅᑎᑦᑎᓂᖅ ᓚᐃᓴᓐᓯᑖᖅᑎᑦᑎᓂᕐᓗ

ᐊᑐᖅᓯᔪᓐᓇᐅᑎᑖᖅᑎᑦᑎᓂᖅ ᓚᐃᓴᓐᓯᑖᖅᑎᑦᑎᓂᕐᓗ

ᐊᑐᖅᓯᔪᓐᓇᐅᑎᑦ ᓚᐃᓴᓐᓯᓪᓗ ᑎᑎᖅᑲᐅᕗᑦ ᐱᔭᐅᑎᑕᐅᕙᒃᖢᑎᒃ ᐊᐅᓪᓚᑕᖃᖅᑎᐅᔪᓂᑦ ᐊᔪᙱᑎᑦᑎᔾᔪᑕᐅᓪᓗᑎᒃ ᖃᓄᐃᓕᐅᖅᑕᖃᕐᓂᕐᒥᒃ ᐊᑐᖅᑕᖃᕐᓂᕐᒥᒡᓗ ᓇᓂᑐᐃᓐᓇᖅ ᐃᓂᐅᔪᒥ. ᐊᑐᖅᓯᔪᓐᓇᐅᑎᑖᖅᑎᑕᐅᓂᖅ ᓚᐃᓴᓐᓯᑖᖅᑎᑕᐅᓂᕐᓗ ᐱᒋᐊᖅᑎᑕᐅᕙᒃᐳᖅ ᐱᓕᕆᐊᒃᓴᖅᑖᕆᔭᐅᓇᓱᒃᑐᖅ ᐊᕙᑎᓕᕆᔾᔪᓯᕆᓂᐊᖅᑕᖓᓄᑦ ᕿᒥᕐᕈᔭᐅᕌᓂᒃᓯᒪᓕᖅᐸᑦ. ᐊᕙᑎᓕᕆᔾᔪᓯᕆᓂᐊᖅᑕᖓᑦᑕ ᕿᒥᕐᕈᔭᐅᓂᖓᓂᑦ ᐊᕙᑎᓕᕆᐊᖃᕐᓂᕐᒧᑦ ᐊᖏᖃᑎᒌᒍᑎᑖᖅᐹᒃᐳᑦ. ᓄᓇᒥᒃ ᐊᑐᖅᓯᓂᕐᒧᑦ ᐱᔪᓐᓇᐅᑎ, ᐃᒪᖅᑐᕐᓂᕐᒧᓪᓗ ᓚᐃᓴᓐᓯᑦ ᐃᓚᒋᔭᐅᑐᐃᓐᓇᖅᐳᑦ ᐅᓄᖅᑐᕋᓴᖕᓂᑦ ᐱᔭᐅᔭᕆᐊᖃᖅᐸᒃᑐᓂᑦ ᐅᔭᕋᖕᓂᐊᕐᕕᖃᓕᕈᒪᔪᓄᑦ. ᑲᓇᑕᐅᑉ ᒐᕙᒪᒃᑯᖏᓐᓂᙶᖅᑐᓂᑦ ᐱᔾᔪᐊᖑᓛᖑᕗᖅ ᐃᒪᖅᑐᕐᓂᕐᑦ ᓚᐃᓴᓐᓯ. ᑖᔅᓱᒨᓇ ᐅᔭᕋᖕᓂᐊᕐᕖᑦ ᒪᓕᒃᓯᔭᕆᐊᖃᖅᐸᒃᐳᑦ ᖃᓄᖅ ᐃᒪᖅᑐᖅᑎᒋᔪᓐᓇᕐᒪᖔᕐᒥᒃ, ᐊᒻᒪ ᖃᓄᖅ ᐃᒪᑦᑎᐊᕙᐅᑎᒋᔭᕆᐊᖃᕆᐊᒃᓴᖓ ᐊᕙᑎᒋᔭᕐᒧᑦ ᐅᑎᖅᑎᑕᐅᓚᐅᖅᑳᖅᑎᓐᓇᒍ.

ᑎᓯᐱᕆ 2010ᒥ, ᑎ ᐱᐅᕐᔅ ᐊᐃᑦᑑᑎᖃᓚᐅᖅᐳᑦ ᒑᑦᓲ ᑰᐃᒧᑦ ᐊᕙᑎᒥᒃ ᐊᒃᑐᐃᓂᖃᕐᓂᕐᒧᑦ ᕿᒥᕐᕈᓯᔾᔪᑎᒋᔭᕐᒥᖕᓂᒃ (ᓇᓕᖅᑲᖏᑦ ᑕᕝᕙᐅᕗᑦ) ᒪᑲᓐᔨ ᓈᖅᓴᕐᔪᐊᖓᑕ ᕿᒥᕐᕈᔭᖃᕐᓂᕐᒧᑦ ᑲᑎᒪᔨᖏᓐᓄᑦ. ᐱᓕᕆᐊᕆᔭᐅᔪᒪᔪᖅ ᑲᑎᒪᔨᓂᑦ ᐊᖏᖅᑕᐅᓂᖅᑖᓚᐅᖅᐳᖅ ᔪᓚᐃ 2013ᒥ. ᐊᔾᔨᙳᐊᕐᒦᑉᐳᑦ ᑎ ᐱᐅᕐᔅ ᑲᓇᑕᐅᑉ ᐊᑐᖅᑕᐅᑎᑦᑎᓂᕐᒧᑦ ᑲᒪᔨᖓᑦ ᐹᓪ ᑰᐸᓐ. ᒑᑦᓲ ᑰᐃ ᑕᓪᓕᒪᒋᔭᐅᓕᕋᔭᖅᐳᖅ ᑲᓇᑕᒥ ᑕᐃᒪᓐᑕᕐᕕᐅᓗᓂ, ᓯᕗᓪᓖᑦ ᑎᓴᒪᑦ ᓴᓇᔭᐅᕌᓂᒃᓯᒪᓕᖅᑎᓪᓗᒋᑦ ᓄᓇᑦᓯᐊᖅ/ᓄᓇᕗᒻᒥ. ᐊᔾᔨᙳᐊᖁᑎᒋᔭᖅ ᑎ ᐱᐅᕐᔅ

ᓄᓇᑦᓯᐊᕐᒥ, ᑕᐃᒪᓐᓯᐅᖅᑎᑦ ᒐᕙᒪᐅᔪᓪᓗ ᐊᑎᓕᐅᖅᓯᓚᐅᖅᐳᑦ ᑲᓇᑕᒧᑦ ᓯᕗᓕᕆᔭᐅᓪᓗᐊᖅᑐᓂᒃ ᐃᑲᔫᓯᐊᕐᓂᕐᒧᑦ ᐊᖏᖃᑎᒌᒍᑎᓂᒃ, ᖃᐅᔨᒪᔭᐅᔾᔪᑎᖃᒃᑲᓐᓂᖅᖢᑎᒃ ᐱᓕᕆᖃᑎᖃᖃᑎᒌᖕᓂᕐᒧᑦ ᐊᖏᖃᑎᒌᒍᑎᑦ. ᐅᔭᕋᖕᓂᐊᕐᕖᒃ ᐱᓂᐊᖅᑕᖃᕐᓂᕆᓂᕋᖅᑕᒥᖕᓂᒃ ᓇᓗᓇᐃᕆᓚᐅᕆᕗᑦ ᐃᓅᓯᖃᖃᑎᒌᒍᑎᓄᑦ-ᒪᑭᒪᔾᔪᑎᖃᕈᑎᑎᒍᓪᓗ ᒥᐊᓂᕆᔭᖃᕐᓂᒃᑯ ᐊᖏᖃᑎᒌᒍᑎᒃᑯᑦ ᓄᓇᑦᓯᐊᑉ ᒐᕙᒪᖏᓐᓄᑦ. ᐊᔾᔨᑲᓴᖏᑦᑎᒍᑦᑕᐅᖅ ᐅᔭᕋᖕᓂᐊᕐᕖᑦ ᓄᓇᕗᒻᒥ ᐊᑎᓕᐅᕆᓚᐅᕆᕗᑦ ᐃᓄᖕᓄᑦ ᐱᕚᓪᓕᐅᑕᐅᔪᓐᓇᖅᑐᒃᓴᓄᑦ ᐊᖏᖃᑎᒌᒍᑎᓂᒃ. ᑖᒃᑯᑎᒎᓇᖅ ᐊᖏᖃᑎᒌᒍᑎᑎᒍᑦ ᐱᓂᐊᖅᑕᕆᔭᖃᕐᓂᕋᖅᐳᑦ ᐱᓕᒻᒪᒃᓴᐃᑎᑦᑎᓂᕐᒥᒃ, ᐃᖅᑲᓇᐃᔮᖃᖅᑎᑦᑎᓂᕐᒥᒃ, ᓇᖕᒥᓂᖁᑎᒋᔭᓪᓗ ᐱᕚᓪᓕᐅᑎᒃᓴᖏᓐᓂᒃ, ᓄᓇᓕᖁᑎᒋᔭᕐᓄᑦ ᑮᓇᐅᔾᔭᒍᑕᐅᕚᓪᓕᐅᑎᒃᓴᖃᖅᑎᑦᓂᖅ ᐊᒻᒪ, ᑐᓴᐅᒪᔭᐅᑦᑎᐊᕐᓂᖅ. ᑖᒃᑯᐊ ᐊᖏᖃᑎᒌᒍᑎᑦ ᖃᓂᕐᕋᖅᑎᐅᒻᒪᕆᒃᐳᑦ ᐱᑕᖃᓕᖅᑎᑦᑎᓚᐅᕐᒪᑕ ᐅᓪᓗᒥᓕᓴᐅᓂᖅᐹᖑᔪᓂᒃ ᓄᓇᒋᔭᕐᓄᑦ ᓇᐅᑦᑎᖅᓲᒪᔭᐅᔪᓐᓇᕐᓂᕐᒥᒃ, ᐃᓚᐅᖃᑎᑕᐅᑎᑕᐅᓂᕐᒥᒃ, ᐊᒻᒪ ᒥᐊᓂᕆᔭᖃᖃᑎᒌᖕᓂᕐᒥᒃ. ᑕᒪᒃᑯᐊ ᐊᖏᖃᑎᒌᒍᑎᑦ ᐊᑑᑎᖃᖅᐳᑦ ᓄᓇᕐᔪᐊᒥ ᐃᔾᔪᐊᒐᒃᓴᑦᑎᐊᕙᐅᓪᓗᑎᒃ ᓄᓇᓕᒋᔭᐅᔪᑦ ᐊᑑᑎᓕᓪᓚᕆᖕᒥᒃ ᐃᓚᐅᖃᑕᐅᓂᖃᕈᓐᓇᕆᐊᒃᓴᖏᓐᓂᒃ ᐅᔭᕋᖕᓂᐊᕐᓂᐅᔪᒥᒃ.

ᐅᓪᓗᒥᓕᓴᐅᓂᖅᐹᖑᔪᓂᑦ ᐊᖏᖃᑎᒌᒍᑎᒋᔭᑦ ᐅᔭᕋᖕᓂᐊᕐᕕᖕᓄᑦ ᐃᓚᖃᕆᐊᖃᖅᐳᑦ ᖃᐅᔨᒪᔭᐅᔾᔪᑎᓕᑉᒥᑦ ᐃᓅᖃᑎᒌᖕᓂᕐᒧᖓᔪᑦ ᓚᐃᓴᓐᓯᒋᔭᖅ ᐅᔭᕋᖕᓂᐊᕈᓐᓇᕐᓂᐊᕐᓗᑎᒃ. ᑖᓐᓇ ᓚᐃᓴᓐᓯ ᐱᔾᔪᑎᖃᖅᐳᖅ ᐅᔭᕋᖕᓂᐊᕐᕕᐅᑦ ᐊᖏᖅᓯᒪᔭᐅᓂᖃᕐᓂᕆᔭᖓᓂ ᓄᓇᓕᐅᔪᓄᑦ. ᐅᑭᐅᖅᑕᖅᑐᕐᒥ, ᑕᒪᓐᓇ ᐱᕐᔪᐊᖑᔪᒻᒪᕆᐊᓘᕗᖅ ᓄᓇᖃᖅᑳᖅᑐᓄᑦ ᓄᓇᒋᔭᐅᖕᒪᑕ ᐊᑐᖅᑕᐅᔪᒃᓴᑦ ᐱᕙᓪᓕᖅᐸᓪᓕᖅᑎᑕᐅᓂᖏᑎᒍᑦ ᐊᒃᖢᐃᓕᖅᐹᓪᓕᐅᑎᒃᓴᖅᓯᐅᖅᐸᖕᒪᑕ ᓄᓇᓕᖕᒥᐅᓪᓗ ᖃᓄᐃᖏᑦᑎᐊᖅᐹᓪᓕᐅᑎᒃᓴᕆᔪᓐᓇᕐᓂᐊᕐᓗᓂᒋᑦ. ᐅᑭᐅᖅᑕᖅᑐᕐᒥ, ᐅᓪᓗᒥᓕᓴᐅᔪᑦ ᐊᖏᖃᑎᒌᒍᑎᒋᔭᑦ ᓴᖅᑭᔮᖅᑎᑦᑎᕗᑦ ᐱᓕᕆᐊᖃᕐᕕᐅᕙᒃᑐᓂᒃ ᑐᕌᖅᑕᖃᕐᕕᒋᔭᖃᖅᑐᓂᒃ ᓄᓇᖃᖅᑎᐅᔪᑦ ᐱᔪᓐᓇᖅᐹᓪᓕᐅᑎᒃᓴᖏᓐᓂᒃ.

ᐅᑭᐅᖅᑕᖅᑑᑉ ᐅᓪᓗᒥᓕᓴᐅᓪᓗᓂ ᓯᕗᒻᒧᐊᒃᐸᓪᓕᐊᔨᐅᓪᓗᓂ ᐅᔭᕋᖕᓂᐊᒃᓴᒃᓂᒃ ᐱᓕᕆᐊᖃᕐᕕᐅᕙᒃᑐᖅ ᐊᑐᖅᓯᓂᖃᕐᐸᓪᓕᐊᕐᔪᐊᖅᐳᖅ ᓄᓇᖃᖅᑳᖅᑐᓅᖓᔪᒧᑦ ᓴᐃᒻᒪᐅᑎᖃᑎᒌᒋᐊᖃᕐᓂᕐᒥᒃ. 2015ᖑᑎᓪᓗᒍ, ᐃᓅᖃᑎᒌᑦᓯᐊᒃᑲᓐᓂᕈᓐᓇᕐᓂᕐᒧᑦ ᓇᓛᒎᖅᑐᓂᒃ ᑭᓪᓕᓯᓂᐊᖅᑏᑦ 94ᓂᒃ ᖃᓄᐃᓕᕆᐊᖃᖁᔨᔾᔪᑎᓕᐅᓚᐅᖅᐳᑦ ᑲᓇᑕᒥᐅᓕᒫᓂᒃ ᐃᓚᐅᖃᑕᐅᓕᖁᔨᓪᓗᑎᒃ ᑐᕌᕆᔭᐅᔪᒥ ᓄᓇᖃᖅᑳᖅᑐᓅᖓᔪᒧᑦ ᓴᐃᒻᒪᐅᑎᖃᑎᒌᒋᐊᖃᕐᓂᕐᒥᒃ. ᖃᓄᐃᓕᕆᐊᖃᖁᔨᔾᔪᑎ ᓇᐃᓴᐅᑎᓕᒃ 92 ᑐᒃᓯᕋᖅᓯᕗᖅ ᑯᐊᐳᕇᓴᐅᔪᑦ ᓱᓐᓂᐅᑎᓂᖃᕋᔭᖅᑐᓂᒃ ᑐᓴᕆᐊᕐᕕᒋᔭᖃᖃᑦᑕᖁᔨᓪᓗᑎᒃ ᐊᒻᒪ ᐅᐱᒍᓱᖕᓂᖃᑦᑎᐊᖅᑐᒥᒃ ᐱᓕᕆᐊᖃᖃᑎᒌᖕᓂᖃᖁᔨᓪᓗᑎᒃ ᓄᓇᖃᖅᑳᖅᑐᓂᑦ, ᓄᓇᖏᓐᓂᑦ, ᐊᒻᒪ ᐊᑐᖅᑕᐅᔪᓐᓇᖅᑐᒃᓴᐅᑎᖏᓐᓂᒃ, ᐃᓚᒋᔭᐅᖃᓯᐅᔾᔭᐅᓪᓗᑎᒃ ᓇᓕᒧᒃᓲᑎᓂᓕᖕᒥᒃ ᐃᖅᑲᓇᐃᔮᖅᑖᕋᓱᒍᓐᓇᕐᓂᖅ, ᐱᓕᒻᒪᒃᓴᖅᑎᑕᐅᓂᖅ ᐊᑑᑎᖃᑯᑖᒍᑕᐅᔪᓐᓇᕐᓂᐊᖅᑐᒥᒃ ᑲᔫᓯᓐᓇᕐᓂᖃᖅᑐᓂᒃ ᐃᑲᔫᑕᐅᕙᒃᑐᓄᑦ. ᐅᑭᐅᖅᑕᖅᑐᕐᒥ ᐅᔭᕋᖕᓂᐊᕐᕖᑦ ᓴᖅᑭᔮᖅᑎᑦᑏᓐᓇᖅᐳᑦ ᐊᒃᓱᕈᕆᔭᖃᕐᓂᕐᒥᒃ ᑎᑭᐅᑎᓇᓱᖕᓂᕐᒥᒃ ᐱᓂᐊᖅᑕᕆᔭᕆᐊᖃᖅᑕᒥᖕᓂᒃ ᐅᓂᒃᑳᓕᐊᖃᖅᐸᒃᖢᑎᒡᓗ ᖃᓄᑎᒋ ᑎᑭᐅᑎᓂᖃᖅᓯᒪᔭᕆᐊᒃᓴᕐᒥᖕᓂᒃ.