ᑐᑦᑕᕐᕕᒃ » ᓄᓇᓕᕆᓂᖅ

ᓄᓇᓕᕆᓂᖅ

ᓄᓇᓕᕆᓂᖅ ᖃᐅᔨᓴᖅᑕᖃᕐᓂᐅᕗᖅ ᓄᓇᕐᔪᐊᕐᒥᒃ, ᑭᓱᒥᑦ ᓴᓇᓯᒪᕙ, ᐊᒻᒪ ᖃᓄᖅ ᐅᔭᖅᑲ ᑕᐃᒫᙳᖅᑐᕕᓂᐅᓐᓂᕐᒪᖔᑕ. ᓄᓇᓕᕆᓂᕐᒥᒃ ᐃᓕᓐᓂᐊᖅᐸᒃᑐᑦ ᑕᐃᔭᐅᓂᖃᖅᐳᑦ ᓄᓇᓕᕆᓂᕐᒥᒃ ᖃᐅᔨᓴᖅᑎᑦ ᐅᕝᕙᓘᓐᓃᑦ ᓄᓇᓕᕆᔨᑦ, ᕿᓂᖅᐸᒃᐳᑦ ᓴᖅᑭᑎᕆᕙᒃᐳᓪᓗ ᖃᐅᔨᔭᖃᖅᐹᓪᓕᕈᑕᐅᔪᓐᓇᖅᑐᓂᒃ ᖃᐅᑕᒫᑦ ᐱᓕᕆᓂᕆᔭᒥᒃᑯᑦ.

9ᖑᕗᑦ ᐊᒡᒍᖅᑕᐅᓂᕆᓯᒪᔭᑦ ᓄᓇᑦᓯᐊᕐᒥᒃ ᓄᓇᕗᒻᒥᒡᓗ ᑖᒃᑯᐊ ᑕᐃᕙᒃᐸᖓᑦ ‘ᐳᕌᕕᓐᓯᑦ. ᐊᔾᔨᙳᐊᖅ: ᓄᓇᑦᓯᐊᕐᒥ ᓄᓇᐅᑉ ᑭᒡᓕᓯᓂᐊᖅᑕᐅᓂᖓ
ᐊᔾᔨᙳᐊᖅ: ᓄᓇᑦᓯᐊᕐᒥ ᓄᓇᐅᑉ ᑭᒡᓕᓯᓂᐊᖅᑕᐅᓂᖓ

ᓄᓇᓕᕆᓂᕐᒥᒃ ᖃᐅᔨᓴᖅᑎᑦ ᐊᒡᒍᐃᓯᒪᕗᑦ ᓄᓇᑦᓯᐊᕐᒥᒃ ᓄᓇᕗᒻᒥᒡᓗ 9ᖑᓪᓗᒋᑦ ᑖᒃᑯᐊ ᑕᐃᕙᒃᐸᖓᑦ ‘ᐳᕌᕕᓐᓯᑦ’, ᐊᑐᓂ ᐱᑐᖃᐅᑎᒋᓂᖃᖅᖢᑎᒃ ᐊᑐᖅᑕᖃᕐᓂᑰᓯᒪᓪᓗᑎᒡᓗ ᐊᒻᒪ ᐃᓛᒃᑯᑦ ᑕᑯᒥᓇᖅᑑᑎᓂᒃ ᐊᔾᔨᒌᙱᑦᑑᑎᓂᒃ ᐅᔭᕋᖕᓂᐊᒐᒃᓴᖅᑕᖃᑐᐃᓐᓇᕆᐊᖃᖅᑐᖅᑕᖃᖅᐳᑦ.

ᐅᑭᐅᖅᑕᖅᑑᑉ ᐊᖏᔪᕐᔪᐊᕌᓘᓂᖓᓄᑦ, ᐱᓕᕆᐊᕆᔭᕐᓂᙱᑦᑐᒥᒡᓗ ᓄᓇᖃᕐᓂᐊᓄᑦ ᐊᒃᓱᕈᕐᓇᖅᑐᖅᓯᐅᕐᓇᖅᑐᒥᒡᓗ ᓯᓚᖃᕐᓂᐊᓄᑦ, ᓄᓇᖓ ᕿᒥᕐᕈᔭᐅᓯᒪᓂᑭᑉᐳᖅ ᓄᓇᙳᐊᑎᒍᓪᓗ ᖃᓄᐃᑦᑑᓂᖓ ᓇᓗᓇᐃᖅᑕᐅᓯᒪᓗᐊᕋᓂ. ᑕᒪᒃᑯᐊ ᐊᔪᕈᑕᐅᔪᑦ ᐱᓪᓗᒋᑦ ᓇᓂᓯᔪᓐᓇᑐᐃᓐᓇᕆᐊᖃᑦᑎᐊᖅᑐᖅ ᐃᔨᖅᓯᒪᔪᓂᒃ ᐅᔭᕋᖕᓂᐊᖅᑕᐅᔪᓐᓇᖅᑐᓂᒃ. ᑕᐃᒪᐃᓕᖓᓄᓪᓗ ᑐᑭᖃᕆᕗᖅ ᐱᕕᒃᓴᖅᑕᖃᙱᓐᓂᖅᓴᐅᔪᖅ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᐅᑭᐅᖅᑕᖅᑐᕐᒥ (ᕿᔪᐃᔭᐃᓂᖅ, ᐱᕈᖅᓰᓂᖅ, ᐆᒪᔪᖁᑎᖃᕐᓂᖅ ᑭᓱᒃᓴᓕᐊᕆᔭᒃᓴᒥᒃ, ᑭᓱᓕᐅᕐᕕᖃᕐᓂᖅ, ᐊᓯᖏᓪᓗ) ᑕᐃᒪᐃᓐᓂᑯᐊᓄᑦ ᐅᔭᕋᖕᓂᐊᒐᒃᓴᑦ ᐅᑭᐅᖅᑕᖅᑑᑉ ᑮᓇᐅᔭᓕᐅᕐᕕᐅᔪᓐᓇᕐᕕᒋᕙᐃᑦ.

ᐅᑭᐅᖅᑕᖅᑐᕐᒥ ᐊᔾᔨᑑᑎᕈᓘᔭᕐᓂᒃ ᐅᔭᕋᒃᑕᖃᐅᖅᐳᖅ, ᐅᓄᖅᑐᒻᒪᕇᓪᓗ ᐊᒃᖢᐃᑦᑐᙳᖅᐹᓪᓕᕈᑕᐅᔪᓐᓇᖅᖢᑎᒃ ᒪᑯᐊ ᐃᓚᐃᓐᓇᕆᕙᐃᑦ ᓴᓇᙳᐊᒐᒃᓴᖅ, ᑕᐃᒪᓐ, ᒎᓗ ᐊᓯᖏᓪᓗ ᐊᒥᓱᒻᒪᕆᐊᓗᐃᑦ ᐅᔭᕋᖕᓂᐊᒐᒃᓴᑦ ᓴᕕᕋᔭᐃᓪᓗ.

ᓄᓇᓕᕆᓂᕐᒥᒃ ᖃᐅᔨᓴᖅᑎᑦ ᐅᔭᕋᒃᓯᐊᓚᐅᖅᐳᑦ ᐅᑭᐅᖅᑕᖅᑐᕐᒥ ᓄᓇᕐᔪᐊᓕᒫᕐᒥ ᐱᑐᖃᐅᓛᖑᑦᑎᐊᖅᑐᒥᒃ. 1989ᖑᑎᓪᓗᒍ, ‘ᑐᓇᓕᑎᒃ ᓇᐃᔅ’ ᓇᒡᕚᖅᑕᐅᓚᐅᖅᐳᖅ ᐊᑳᔅᑕ ᑰᖓᑕ ᖃᓂᒋᔮᓂ ᓄᓇᑦᓯᐊᕐᒥ ᐊᕐᕌᒍ 4 ᐱᓕᐊᓐ ᐊᓂᒍᖅᓯᒪᓕᖅᑎᓪᓗᒋᑦ ᐅᔭᕋᒍᓚᐅᕐᓂᖓᓂᑦ!

ᖃᐅᔨᕚᓪᓕᖅᑕᖃᕈᒪᒍᕕᑦ ᐅᑭᐅᖅᑕᖅᑑᑉ ᓄᓇᖓᓂᒃ ᐅᐸᒡᓗᒋᑦ ᓄᓇᑦᓯᐊᕐᒥ ᓄᓇᐅᑉ ᑭᒡᓕᓯᓂᐊᖅᑕᐅᓂᖓ ᐊᒻᒪᓗ ᑲᓇᑕᐅᑉ-ᓄᓇᕘᓪᓗ ᐅᔭᖅᑲᓂᒃ ᖃᐅᔨᓴᖅᑎᖏᑦ.

ᓄᓇᐅᑉ ᐃᓗᐊᓂ TMAC’ᑯᑦ ᑲᐱᓯᓕᒃᑑᕐᒥ ᒎᓗᒧᑦ ᐅᔭᕋᖕᓂᐊᕐᕕᖓᓂᒃ. TMAC, ᐊᒻᒪᓗ ᐊᒡᓂᑯᓪ ᐄᒍᓪ, ᐱᓕᕆᔭᐅᑎᑦᑎᔪᑦ ᐊᐳᖅᑎᓈᖅᑐᖅ ᒎᓗᒧᑦ ᐅᔭᕋᖕᓂᐊᕐᕕᖓᓂᒃ, ᑲᑎᓚᐅᖅᐴᒃ 2017ᒥ ᐅᔭᕋᖕᓂᐊᖅᑕᐅᓂᖏᓐᓄᑦ 7%ᑎᒋ ᑲᓇᑕᐅᑉ ᒎᓕᖏᓐᓂ (361,117 ᒎᓗᑉ ᐅᖁᒪᐃᓐᓂᕐᓂᐊᕈᓯᐊᒍᑦ ᐊᑭᖃᖅᖢᑎᒃ C$594 ᒥᓕᐊᓐ).