ᐅᔭᕋᖕᓂᐊᕐᕖᑦ ᐱᕙᓪᓕᐊᑦᑎᐊᖅᑐᑦ ᐊᐅᓚᓐᓂᖃᖅᐸᒃᐳᑦ ᐱᓕᕆᖃᑎᖃᖅᖢᑎᒃ ᓄᓇᓕᖕᓂᒃ. ᑕᐃᒪᓕᐅᕆᓂᒃᑯᑦ ᓄᓇᓖᑦ ᐃᑲᔫᓯᐊᖅᑖᖅᐸᖕᒪᑕ ᐃᓚᒋᔭᐅᓪᓗᑎᒃ ᐱᓕᒻᒪᒃᓴᖅᑎᑕᐅᓃᑦ, ᐃᖅᑲᓇᐃᔮᖃᕐᓂᖅ, ᐊᒻᒪ ᓇᖕᒥᓂᖃᖅᑎᐅᔪᓄᑦ. ᑕᒪᒃᑯᐊ ᐱᓕᕆᖃᑎᒌᖕᓂᐅᔪᑦ ᐱᓪᓚᕆᙳᖅᑎᑕᐅᕙᒃᐳᑦ ᐊᒃᑐᐃᓯᒪᔭᖃᕐᓂᕐᒧᑦ ᐃᑲᔫᓯᐊᑦ ᐊᖏᖃᑎᒌᒍᑎᑎᒍᑦ ᐊᒻᒪ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᑎᒍᑦ.
ᐊᒻᒪ ᓱᓕ, ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᑦ ᑮᓇᐅᔭᑎᒍᑦ ᐃᑲᔪᖅᓯᕙᒃᐳᑦ ᑐᓂᓯᓂᖃᕐᓂᒃᑯᑦ ᑮᓇᐅᔾᔭᒃᓴᐅᑕᐅᓇᓱᒃᑐᒧᑦ, ᖃᓄᐃᓕᐅᕐᓂᕆᔭᐅᔪᒧᑦ ᐊᑭᓖᓂᖃᕐᓂᒃᑯᑦ, ᐃᓕᓐᓂᐊᖅᑐᓄᓪᓗ ᑮᓇᐅᔭᖃᖅᑎᑦᑎᓂᒃᑯᑦ. ᐅᑭᐅᖅᑕᖅᑐᕐᒥ, ᐅᔭᕋᖕᓂᐊᕐᕖᑦ ᑎᑭᐅᒪᔭᐅᓇᓱᒍᓐᓇᖅᑐᓂᒃ ᓴᖅᑮᓯᒪᓕᖅᐳᑦ ᖃᓄᒃᑲᓐᓂᖅ ᐱᓕᕆᐊᖃᖅᑎᐅᔪᑦ ᐱᓂᐊᕐᓂᖃᕐᕕᒋᔭᖃᕈᓐᓇᕐᒪᖔᑕ ᓄᓇᓕᖕᓄᑦ ᐃᑲᔫᓯᐊᖑᔪᓐᓇᖅᑐᓂᒃ.
ᐃᓕᓐᓂᐊᖅᑐᓂᒃ ᑮᓇᐅᔭᖅᑖᖅᑎᑦᑎᖃᑦᑕᕐᓂᒃᑯᑦ, ᐅᔭᕋᖕᓂᐊᕐᕖᑦ ᐊᑐᕐᓂᖃᕐᕕᒋᔪᒫᕐᓂᐊᖅᑕᒥᖕᓄᑦ ᐱᑎᑦᑎᕙᒃᐳᑦ ᐃᑲᔪᖅᓯᓂᒃᑯᑦ ᐃᓕᓐᓂᐊᒃᑲᓐᓂᖅᐸᓪᓕᐊᓂᕆᔭᐅᔪᒥᒃ. ᐅᔭᕋᖕᓂᐊᕐᕕᒃᑕᖃᕐᓂᖏᓐᓄᑦ ᑕᐅᓴᑎᖏᓐᓃᑦᑐᑦ ᐅᑭᐅᖅᑕᖅᑐᕐᒥᐅᑦ ᐃᑲᔫᓯᐊᖅᑖᖅᓯᒪᕗᑦ ᖃᔅᓯ ᒥᓕᐊᓐ ᑖᓚᕋᓴᖕᓂᒃ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᕆᑎᑕᐅᕙᒃᑐᑎᒍᑦ ᐃᓕᓐᓂᐊᖅᑐᓂᒃ ᐊᔪᕐᓇᙱᓐᓂᖅᓴᖅᓯᐅᕈᑕᐅᓯᒪᔪᓂᒃ ᐱᓕᕆᐊᖃᕋᓱᒃᑎᓪᓗᒋᑦ ᐃᓕᑕᖃᖅᐸᓪᓕᐊᓂᕐᒧᑦ ᐃᖅᑲᓇᐃᔮᕆᓐᓇᒐᒃᓴᒥᓄᓕᓗ ᐱᕙᓪᓕᖅᐹᓪᓕᕋᓱᒃᑎᓪᓗᒋᑦ.
ᐅᑭᐅᖅᑕᖅᑑᑉ ᐅᔭᕋᖕᓂᐊᕐᓂᕐᒧᑦ ᐱᓕᕆᓂᖃᖅᑎᖏᑦ ᐊᑐᕐᓂᖃᕐᕕᒋᔪᒫᕐᓂᐊᖅᑕᒥᖕᓄᑦ ᐱᑎᑦᑎᕙᒃᑭᕗᑦ ᓄᓇᓕᖕᓂᒃ ᐃᑲᔪᖅᓯᓂᒃᑯᑦ ᓄᓇᖃᖅᑳᖅᑑᓪᓗᑎᒃ ᐱᓕᕆᐊᒃᓴᕆᔭᕐᓄᑦ ᖃᓄᐃᓕᐅᕐᓂᕆᔭᕐᓄᓪᓗ, ᐊᒻᒪ ᐊᑭᓕᖅᓱᖅᑕᐅᓇᑎᒃ ᐃᑲᔪᕐᓂᒃᑯᑦ.
ᐱᓕᒻᒪᒃᓴᐃᓂᒃᑯᑦ, ᐃᖅᑲᓇᐃᔮᖃᕐᓂᖅ, ᓇᖕᒥᓂᖃᖅᑎᐅᔪᓄᑦ, ᓄᓇᓕᖕᓂᓪᓗ ᐊᑑᑎᒋᔪᓐᓇᕈᒫᖅᑕᒥᖕᓂᒃ ᐱᓕᕆᓂᖃᕐᓂᒃᑯᑦ, ᐅᔭᕋᖕᓂᐊᕐᓂᓕᕆᓂᕐᒥᒃ ᐱᓕᕆᐊᒃᓴᓖᑦ ᓯᕗᒧᒃᐸᓪᓕᐊᓯᒪᓂᖃᑦᑎᐊᖅᐳᖅ ᓄᓇᖃᖅᑳᖅᑐᓄᑦ ᓴᐃᒻᒪᐅᑎᖃᑎᒌᖕᓂᕐᒧᑦ.
2015ᖑᑎᓪᓗᒍ, ᐃᓅᖃᑎᒌᑦᓯᐊᒃᑲᓐᓂᕈᓐᓇᕐᓂᕐᒧᑦ ᓇᓛᒎᖅᑐᓂᒃ ᑭᓪᓕᓯᓂᐊᖅᑏᑦ ᑎᓕᓯᓂᖃᓚᐅᖅᐳᑦ 94ᓂᒃ ᑎᓕᐅᕆᔾᔪᑎ ᑲᓇᑕᒥᐅᓗᒃᑕᑦ ᐃᓚᐅᓂᖃᖁᔭᐅᓪᓗᑎᒃ ᓄᓇᖃᖅᑲᖅᑐᓄᑦ ᓴᐃᒻᒪᖃᑎᒌᖕᓂᕐᒧᑦ. ᑎᓕᐅᕆᔾᔪᑎ ᓇᐃᓴᐅᑎᓕᒃ 92 ᑯᐊᐳᕇᓴᐅᔪᑦ ᐊᑑᑎᖃᓪᓚᕆᒃᑐᓂᒃ ᐅᖃᖃᑎᖃᕆᐊᒃᓴᖏᑦ ᐊᒻᒪ ᐅᐱᒍᓱᖕᓂᖃᖅᑐᒥᒃ ᐱᓕᕆᖃᑎᖃᓂᖃᕆᐊᒃᓴᖏᑦ ᓄᓇᖃᖅᑳᖅᑐᓂᒃ ᓄᓇᖓᓐᓂᒃ ᓄᓇᒥᙶᖅᑑᑎᖏᓐᓂᒡᓗ, ᐃᓚᒋᔭᐅᓪᓗᑎᒃ ᓇᓕᒧᒃᓱᖕᓂᓕᖕᒥᒃ ᐃᖅᑲᓇᐃᔮᖅᑖᕈᓐᓇᕐᓂᖅ ᐱᓕᒻᒪᒃᓴᖅᑎᑕᐅᔪᓐᓇᕐᓂᖅ ᐊᑯᓂᐅᓂᖃᖅᑐᒧᑦ ᐃᑲᔫᓯᐊᖃᕐᓇᖅᑐᒥᒃ. ᑎᓕᐅᕆᔾᔪᑎ ᐱᔭᕆᐊᖃᖅᑎᑦᑎᒋᕗᖅ ᓇᖕᒥᓂᖁᑎᓖᑦ ᐃᓕᓐᓂᐊᖅᑕᐅᑎᑦᑎᖃᑦᑕᕋᔭᕆᐊᒃᓴᖏᓐᓂᒃ ᐃᖅᑲᓇᐃᔭᖅᑎᖁᑎᒋᔭᕐᓄᑦ ᓄᓇᖃᖅᑳᖅᑐᑦ ᖃᓄᐃᓕᐅᖅᐸᒍᓯᑐᖃᕐᓂᕆᔭᖏᓐᓂᒃ.
ᐅᔭᕋᖕᓂᐊᖅᑐᓕᕆᔨᑦ ᑲᑐᔾᔨᖃᑎᒌᖓᑦᒃᑯᓐᓄᑦ ᐃᓚᒋᔭᐅᔪᑦ ᐅᑭᐅᖅᑕᖅᑐᕐᒥ ᐱᓕᕆᔪᑦ ᓴᖅᑭᔮᖅᑎᑦᑎᕙᒃᐳᑦ ᐱᓂᐊᕐᓂᖃᕐᓂᕆᔭᕐᒥᖕᓂᒃ ᖃᓄᑐᐃᓐᓇᖅ ᐱᒋᐊᖅᑎᑕᖃᖅᓯᒪᓂᕆᔭᕐᒥᒃᑎᒍᑦ ᐊᒻᒪ ᐊᓂᒍᐃᑎᑦᑎᖃᑦᑕᕐᓂᕐᒥᒃᑎᒍᑦ ᑎᑭᐅᑎᓇᓱᒃᖢᑎᒃ ᑎᓕᐅᕆᔾᔪᑎ ᓇᐃᓴᑎᓕᒃ 92ᒧᑦ. ᐅᑭᐅᖅᑕᖅᑐᖅ ᐃᓛᒃᑯᑦ ᑲᓇᑕᒥᓕᒫᒨᖓᔪᒥᒃ ᐊᓂᒍᐃᓯᒪᔭᖃᑦᑎᐊᕐᓂᕐᒧᑦ ᐅᓂᒃᑳᒃᓴᖃᖅᐳᖅ ᓄᓇᖃᖅᑳᖅᑐᑦ ᐊᕕᒃᑐᖅᓯᒪᕕᐊᕈᓰᒡᓗ ᒐᕙᒪᖏᑦ, ᓄᓇᓖ, ᐃᓄᐃᑦ ᑲᑐᔾᔨᖃᑎᒌᖏᑦ, ᐃᖅᑲᓇᐃᔭᕐᓂᖃᖅᑎᑦᑎᔪᓪᓗ ᐊᓯᔾᔩᓯᒪᓂᖃᓪᓚᕆᒃᐳᑦ ᓄᓇᖃᖅᑳᖅᑐᑦ ᐃᓚᐅᖃᑕᐅᓂᕆᔭᖓᑦ ᓄᓇᒥᙶᖅᑐᓂᒃ ᐱᔭᖃᕐᓂᕆᔭᒃᓴᑦ ᐱᕙᓪᓕᐊᑎᑕᐅᓂᖏᓐᓄᑦ. ᐆᒃᑑᑎᓪᓗᐊᑕᖅ ᓴᐃᒻᒪᐅᓯᖃᑎᒌᖕᓂᕐᒧᑦ ᐅᑭᐅᖅᑕᖅᑐᕐᒧᑐᐊᖅ ᐊᑐᖅᑕᐅᔪᖅ ᒪᓕᒐᓕᐊᕆᓯᒪᔭᑦ ᓄᓇᖃᖅᑳᖅᑐᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒋᔭᖏᓐᓃᑦᑐᖅ, ᒥᐊᓂᕆᔭᖃᖃᑎᒌᒋᐊᖃᕐᓂᖅ ᓄᓇᒥᙶᖅᑐᓂᒃ ᐱᔭᖃᕐᓂᕆᔭᒃᓴᑦ ᐱᕙᓪᓕᐊᑎᑕᐅᓂᖏᓐᓄᑦ.