ᑐᑦᑕᕐᕕᒃ » ᓄᓇᕐᔪᐊᕐᒥ ᐅᔭᕋᖕᓂᐊᖅᑕᐅᕙᒃᑐᓂᑦ ᐱᖃᑕᖃᕋᔪᙱᑦᑐᑦ

ᓄᓇᕐᔪᐊᕐᒥ ᐅᔭᕋᖕᓂᐊᖅᑕᐅᕙᒃᑐᓂᑦ ᐱᖃᑕᖃᕋᔪᙱᑦᑐᑦ

ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᑦ (REE) 15ᖑᕗᑦ ᐃᓚᐅᕈᑎᖃᙱᑦᑑᓪᓗᑎᒃ ᑕᐃᔭᐅᕙᒃᐳᑦ ᓛᓐᑕᓇᐃᑦ ᐃᓚᐅᕈᑎᖃᙱᑦᑐᑦ ᖃᓄᐃᑦᑑᓂᖏᑕ ᑎᑎᕋᖅᑕᐅᓯᒪᓂᖏᑎᒍᑦ. ᔅᑳᓐᑎᐊᒻ ᐊᒻᒪ ᐃᑦᕆᐊᒻ, ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑑᖃᑕᐅᒻᒪᕆᙱᒃᑲᓗᐊᖅᑎᓪᓗᒋᒃ, ᐃᓚᒋᑎᑕᐅᖃᓯᐅᔾᔭᐅᕘᒃ ᐱᔾᔪᑎᒋᓪᓗᒍ ᐃᓕᖅᑯᓯᖃᖃᑕᐅᐸᓗᖕᓂᕐᒥᖕᓄᑦ ᓛᑕᓇᐃᑦᓄᑦ ᐱᑕᖃᖃᑕᐅᖏᓐᓇᐅᔭᖅᖢᑎᒡᓗ ᑕᒡᕙᓂᑦᑕᐃᓐᓇᖅ ᕿᓂᖅᓴᕐᕕᐅᔪᒥ ᓇᓂᔭᐅᖃᓯᐅᔾᔭᐅᖏᓐᓇᐅᔭᕐᒪᑎᒃ. ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᑦ ᐃᓗᓕᕆᔭᐅᓪᓗᐊᑕᖅᐳᑦ ᐅᓄᖅᑐᓄᑦ ᑲᑉᐳᔾᔭᕆᐊᓕᖕᓄᑦ ᐃᓅᓯᑦᑎᓐᓂ ᐊᑐᐃᓐᓇᖅᐸᒃᑕᑦᑎᓐᓂ, ᐊᓯᖏᓐᓂᓗ ᐊᔾᔨᒌᙱᑑᑎᓂ ᓴᓇᕝᕕᐅᔭᒃᑐᓂ ᐊᑐᖅᑕᐅᓂᖃᕐᓂᒃᑯᑦ.

ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᑦ ᐊᑐᑦᑕᐅᕙᒃᐳᑦ ᐊᔾᔨᒌᙱᑑᑎᓂ ᓴᓇᕝᕕᐅᔭᒃᑐᓂ ᐊᑐᖅᑕᐅᓂᖃᕐᓂᒃᑯᑦ ᐃᓚᒋᔭᐅᓪᓗᑎᒃ ᑲᑉᐳᔾᔭᕆᐊᓖᑦ, ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ, ᐊᓂᕐᓂᖃᕐᓇᙱᑦᑐᒧᑦ ᖃᖓᑦᑕᕐᓂᕐᒧᑦ, ᓄᓇᓯᐅᑎᓄᑦ ᐊᒻᒪ ᓴᐳᒻᒥᒃᖠᕈᑎᓄᑦ. ᓄᓇᕐᔪᐊᓕᒫᒥ ᐱᔪᒪᔭᐅᓂᖃᖅᑎᒋᓂᕆᔭᐅᓚᐅᕐᓂᖏᑦ ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᑦ 2016ᖑᑎᓪᓗᒍ ᓇᓚᐅᑦᑖᖅᑕᐅᓯᒪᕗᖅ 130,000 ᑕᓐᔅ.

ᓂᐱᖅᑲᕐᓇᐅᖏᓐᓇᐅᔭᖅᑐᑦ ᓴᓇᔭᐅᓂᖏᑦ ᐊᑑᑎᓪᓗᐊᑕᕆᔭᐅᕗᖅ ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᓄᑦ, ᐊᑐᖅᑕᐅᓂᖏᑕ 24ᐳᓴᒋᓪᓗᓂᐅᒃ.

ᓂᐱᖅᑲᕐᓇᐅᖏᓐᓇᐅᔭᖅᑐᑦ ᐃᓚᒋᖃᓯᐅᔾᔭᐅᓯᒪᔭᕆᐊᖃᓪᓚᕆᒃᐳᑦ ᐅᓪᓗᒥᓕᓴᐅᓕᖅᑐᒥᒃ ᑲᑉᐳᔾᔭᕆᐊᓖᑦ ᐅᖄᓚᐅᑎᕋᓛᕐᓂ, ᑕᓚᕖᓴᓂ, ᖃᕋᓴᐅᔭᕐᓂ, ᓄᓇᓯᐅᑎᓂ, ᐊᓄᕆᑦᑎᐅᑎᕐᔪᐊᓂ, ᓱᒃᑲᔪᕐᔪᐊᓂ ᑎᖕᒥᓲᓂ ᐊᓯᖏᓐᓂᓗ ᓴᓇᔭᐅᕙᒃᑐᓂ. ᓄᓇᕐᔪᐊᕐᒥ ᐅᔭᕋᑦᑎᐊᕙᐃᑦ ᐱᑕᖃᕋᔪᙱᑦᑐᑦ ᐊᑐᖅᑕᐅᓂᖃᕐᔪᐊᕆᕗᑦ ᓄᑖᙳᖅᐸᓪᓕᐊᔪᓂ ᐊᒻᒪ “ᐊᕙᑎᒧᑦ ᓴᓗᒪᔪᑦ” ᖃᐅᒪᔪᓐᓇᕐᓂᕐᒥᖕᓄᑦ ᐊᒻᒪ ᓱᕐᕋᔮᓇᑎᒃ ᓱᕐᕋᒃᑎᕆᔪᓐᓇᕐᓂᕐᒥᖕᓄᑦ.