ᑐᑦᑕᕐᕕᒃ » ᓴᓇᙳᐊᒐᒃᓴᖅ ᐅᒃᑯᓯᒃᓴᖅ

ᓴᓇᙳᐊᒐᒃᓴᖅ ᐅᒃᑯᓯᒃᓴᖅ

ᓴᓇᙳᐊᕐᓂᖅ ᖃᐅᔨᒪᔮᕆᔭᐅᑦᑎᐊᖅᐳᖅ ᐃᓄᐃᑦ ᐃᓕᖅᑯᓯᖓᑦᑕ ᐃᓚᒋᓂᖓᓄᑦ. ᐊᕐᕌᒍᒐᓴᖕᓄᑦ, ᐃᓄᖕᓄᑦ ᓴᓇᙳᐊᖅᑕᐅᓯᒪᔪᑦ ᐱᐅᔪᖁᑎᒋᔭᐅᕐᔪᐊᖅᓯᒪᕗᑦ ᓇᓂᑐᐃᓐᓇᖅ ᓄᓇᕐᔪᐊᕐᒥ.

ᓴᓇᙳᐊᒐᒃᓴᖅ ᓴᓇᙳᐊᕐᓂᐊᕐᓗᓂ ᐊᑐᖅᑕᐅᕙᒃᑐᖅ, ᐊᑐᒐᒃᓴᐅᑯᑖᒃᐳᖅ ᓴᓇᙳᐊᖅᑎᓄᑦ ᓄᓇᕗᒻᒥ. ᒫᓐᓇᒃᑯᑦ, ᐱᓕᕆᐊᖃᐃᓐᓇᖅᓯᒪᕗᑦ ᐊᑐᐃᓐᓇᐅᓂᖅᓴᐅᑎᑕᐅᓇᓱᒃᖢᑎᒃ ᓴᓇᙳᐊᒐᒃᓴᑦᑎᐊᕙᐃᑦ ᓴᓇᙳᐊᖅᑎᓄᑦ ᓄᓇᓕᓕᒫᓂ ᓄᓇᕗᒻᒥ ᐊᑐᖅᓯᓂᖅᓴᐅᓇᓱᖕᓂᒃᑯᑦ ᓴᓇᙳᐊᒐᒃᓴᖅᑕᕈᓯᑐᖃᕐᓂᖅ ᐊᒻᒪ ᐊᔪᕐᓇᙱᓕᖅᑎᑦᑎᓇᓱᖕᓂᒃᑯᑦ ᐊᓯᖏᓐᓄᑦ ᓄᓇᓕᖕᓄᑦ ᐱᔭᐅᑎᑦᑎᔭᕆᐊᒃᓴᖅ.

ᓴᓇᙳᐊᒐᒃᓴᖅ ᑕᐃᔭᐅᕙᒃᑭᕗᖅ ᐅᑦᑯᓯᒃᓴᖅ, ᓇᑭᙶᕐᓂᖓ ᓄᓇᕗᒻᒥ ᒪᓕᒃᖢᒍ ᐊᔾᔨᒌᙱᑦᑑᑕᐅᕙᒃᐳᖅ ᐃᓚᖏᑦ ᑎᓯᓂᖅᓴᐅᓪᓗᑎᒃ ᐃᓚᖏᑦ ᐊᕿᓐᓂᖅᓴᐅᓪᓗᑎᒃ ᑕᖅᓴᖏᑎᒍᓪᓗ ᐊᔾᔨᒌᙱᒻᒥᖕᒪᑕ ᓴᓇᙳᐊᕆᐊᒃᓴᖏᑦ ᓈᒻᒪᒋᔭᐅᕙᒃᐳᑦ.

ᐅᒃᑯᓯᒃᓴᖅᑕᕐᕕᒃ: ᓇᑭᑦ ᐅᔭᕋᒃᑕᖅᐸᕐᒪᖔᑦᑕ, ᐅᓂᒃᑳᓕᐊᖑᓵᓚᐅᖅᑐᖅ ᓄᓇᕘᑉ ᒐᕙᒪᒃᑯᖏᓐᓄᑦ, ᓴᖅᑭᑎᑕᐅᖃᓯᐅᔾᔭᐅᓚᐅᖅᐳᖅ ᑎᑎᕋᖅᓯᒪᔪᒥᑦ ᓴᓇᐅᒐᐃᑦ: ᖃᓄᖅᑑᕈᓯᖅ ᓴᙱᒃᑎᕆᒋᐊᒃᑲᓐᓂᕋᓱᖕᓂᕐᒥᒃ ᓄᓇᕘᑉ ᓴᓇᙳᐊᖅᑎᖏᓐᓄᑦ. ᑎᑎᕋᖅᑕᐅᓚᐅᖅᐳᖅ ᐃᑲᔪᖅᓯᕚᓪᓕᐅᑕᐅᓇᓱᒃᖢᓂ ᐱᓕᕆᓂᖅᑕᖃᑦᑎᐊᖁᓪᓗᒍ ᓴᓇᙳᐊᕐᓂᕐᒧᑦ ᖃᓄᖅᑑᕈᑕᐅᓇᓱᒃᑑᑉ ᑐᕌᖅᑕᖓᓄᑦ ᓄᓇᕗᒻᒥᑦ ᐱᐅᔫᑎᓂᒃ ᓴᓇᐅᒐᖅᑕᖃᓕᕐᓂᖅᓴᐅᖁᓪᓗᒍ.