ᑲᓇᑕ ᓄᓇᒥᙶᖅᑐᖃᐅᕐᔪᐊᖅᐳᖅ ᐊᑐᖅᑕᐅᔪᓐᓇᖅᑐᒃᓴᐅᑕᐅᔪᓂᒃ ᐊᒻᒪ ᖃᐅᔨᒪᓂᖃᕐᓂᖅ ᓄᓇᒥᒃ ᐊᑐᖅᑕᐅᔪᓐᓇᖅᑐᒃᓴᐅᑕᐅᓂᕆᔭᖏᓐᓂᒡᓗ ᑐᙵᓂᐅᒻᒪᕆᒃᐳᖅ ᕿᓂᖅᑕᖃᕐᓂᕐᒧᑦ, ᐱᓕᕆᐊᖃᕐᓂᕐᒧᑦ, ᐃᓚᒋᔭᐅᖃᑕᐅᓂᕐᒧᓪᓗ ᑲᒪᒋᔭᖃᑦᑎᐊᕐᓂᒃᑯᑦ ᓄᓇᒥᙶᖅᑐᓂᒃ ᐱᕙᓪᓕᐊᑎᑦᑎᓂᕐᒥ.
ᐃᓅᓯᕆᔭᖅ ᐊᓯᔾᔨᖅᓯᒪᔪᕐᔪᐊᕌᓘᕗᖅ ᓄᓇᒥᙶᖅᑐᑦ ᐊᑐᖅᑐᒃᓴᑦ ᐊᑐᖅᑎᑕᐅᓂᕆᓯᒪᔭᖏᑎᒍᑦ. ᐅᖅᓱᐊᓗᒃ (ᐳᓪᓚᖅ, ᐅᖅᓱᖅ, ᐊᕐᔭᒃᓴᖅ) ᐅᖅᑰᓴᕈᑕᐅᕙᒃᐳᖅ, ᓴᓗᒪᑦᑎᐊᖅᑐᒥᒡᓗ ᐆᓇᖅᑐᖃᕐᓇᖅᖢᓂ ᐃᒪᕐᒥᒃ, ᓄᒃᑕᕈᑕᐅᕙᒃᖢᓂᓗ. ᐊᐅᒃᑕᔫᑦ (ᐅᖅᓱᐊᓕᖕᒥᙶᖅᑐᑦ ᐃᓚᐅᕈᑎᑦ) ᐊᑐᖅᑕᐅᔭᕆᐊᖃᖅᐳᑦ ᑭᓱᓕᐊᕆᔭᖃᕐᓂᕐᒧᑦ, ᑐᓴᖅᑎᑦᑎᖃᑦᑕᐅᑎᔾᔪᑎᓄᑦ, ᐊᒻᒪ ᓴᓇᔭᖃᕐᓂᕐᒧᑦ.
ᓴᕕᕋᔭᒃᓴᓂᒃ ᐅᔭᕋᖕᓂᐊᖅᑕᐅᔪᒃᓴᓂᒡᓗ ᐱᑕᖃᓪᓚᕆᒋᐊᖃᖅᐳᖅ ᓄᓇᒃᑰᕈᑎᓄᑦ, ᐃᒡᓗᕐᔪᐊᓄᑦ, ᐊᖏᔫᑎᓄᑦ, ᑲᑉᐳᔾᔭᒐᕐᓄᑦ, ᐊᒻᒪᓗ ᐱᖁᑎᓄᑦ ᐃᓚᒋᔭᐅᓪᓗᑎᒃ ᐱᓚᒃᑑᑎᑦ. ᑭᓱᓗᒃᑖᐸᓗᑦ ᐱᖁᑏᑦ ᐅᓪᓗᒥᓕᓴᖅ ᓄᑖᙳᖅᐸᓪᓕᐊᔪᓂᒃ ᐊᑐᖅᑕᐅᔪᓐᓇᖅᑎᑦᑎᔪᑦ ᐅᔭᕋᖕᓂᐊᖅᑕᐅᔪᒃᓴᓂᒃ ᓴᕕᕋᔭᒃᓴᖃᕆᐊᖃᓲᖑᓪᓗᑎᒡᓗ ᐱᑕᖃᕆᐊᖃᓲᖑᔪᑦ ᐅᔭᕋᖕᓂᐊᕐᕕᖕᓂᑦ.
ᐅᔭᕋᖕᓂᐊᕐᓂᖅ, ᐱᔾᔪᑎᒋᓪᓗᒍ ᓴᖅᑭᑎᑕᐅᓲᑦ ᑭᒃᑯᓕᒫᑦᑎᐊᑦ ᖃᐅᑕᒫᑦ ᐃᓅᓯᖏᓐᓄᑦ ᐃᓚᒋᔭᐅᖃᓯᐅᔾᔭᐅᓯᒪᓂᖏᓐᓄᑦ, ᓇᓂᑐᐃᓐᓈᑦᑎᐊᖅᐳᖅ.
ᑭᖑᓂᕆᔭᕐᒥ ᐅᓪᓗᒥᐅᓕᖅᑐᕐᓗ ᐅᔭᕋᖕᓂᐊᕐᕕᖕᓂᙶᖅᓯᒪᔪᑦ ᐃᓱᒪᒋᓪᓗᒋ, ᐅᐃᒍᓕᐅᑎᓯᒪᔪᑦ ᕿᒥᕐᕈᓗᒋᑦ ᖃᓄᖅ ᐅᔭᕋᖕᓂᐊᕐᕕᖕᓂᙶᖅᓯᒪᔪᑦ ᐅᓪᓗᒥᐅᔪᒧᑦ ᐃᓅᓯᕐᒧᑦ ᐃᓚᒋᔭᐅᖕᒪᖔᑦ ᓄᓇᕐᔪᐊᕐᒥ.