ᒪᑐᔭᐅᓂᖅ ᓄᓇᐅᓪᓗ ᐅᑎᖅᑎᐅᕋᖅᑎᑕᐅᓂᖓ ᐅᔭᕋᖕᓂᐊᕐᕕᐅᓂᑯ ᐅᑎᖅᑎᑕᐅᕋᖅᑎᑕᐅᑦᑎᐊᖅᑎᒋᓇᓱᓲᖅ ᐱᒋᐊᙵᓕᖅᑎᓪᓗᒋᑦ ᖃᓄᐃᓕᖓᓚᐅᕐᓂᖓᑐᑦ. ᑕᒪᓐᓇ ᐃᓚᖃᖅᐳᖅ ᐃᖅᑲᓇᐃᔭᖅᑎᖁᑎᒋᔭᓂᒃ, ᓄᓇᓕᒋᔭᕐᓂᒃ, ᒐᕙᒪᐅᔪᓂᒡᓗ ᐱᕙᒌᔭᖅᑕᐅᓂᕆᔭᖏᓐᓂᒃ. ᐃᓚᖃᕆᕗᖅ ᓴᓇᕐᕈᑎᒋᔭᐅᔪᓂᒃ ᓅᑎᕇᓂᖅ ᐃᒡᓗᖁᑎᒋᔭᕐᓂᒃ ᐃᒍᑦᑎᕆᓂᖅ, ᐃᓂᒋᓂᑯᒥᒡᓗ ᐱᓕᕆᐊᖃᕐᓂᖅ ᐊᑐᙱᑦᑐᑦ ᐅᔭᖅᑲᖅ ᓯᐊᒻᒪᒃᑎᖅᑕᐅᖅᑲᕐᓗᑎᒃ ᓄᓇᓗ ᐱᕈᖅᑐᖅᑖᖅᑐᖅᑎᒃᑲᓐᓂᕐᓗ, ᐊᕙᑎᒋᔭᕐᒥᒡᓗ ᒥᐊᓂᕆᔭᖃᕐᓂᖅ.
ᐅᔭᕋᖕᓂᐊᕐᕕᓕᒫᑦᑎᐊᑦ ᐃᓱᖃᙱᑦᑐᒧᑦ ᐱᑕᖃᐃᓐᓇᕈᓐᓇᖅᑐᖃᙱᓚᑦ, ᐱᔾᔪᑎᒋᓪᓗᒍ ᐅᔭᕋᖕᓂᐊᒐᒃᓴᖅ ᓄᖑᑕᐅᖕᒪᓪᓘᓐᓃᑦ ᐊᒥᐊᒃᑯᐊᓘᓐᓃᑦ ᐅᔭᕋᖕᓂᐊᕋᓱᒡᓗᒍ ᐊᑭᑦᑐᕈᑕᐅᓗᐊᓕᖅᐸᑦ.
ᐅᔭᕋᖕᓂᐊᕐᓂ ᑲᔪᓰᓐᓇᖅᐸᒃᑑᙱᓚᖅ ᐃᓛᓐᓃᑦ ᐊᕐᕌᒍᓄᑦ ᖁᓖᓐᓇᕐᓄᑦ ᐱᑕᖃᖅᐸᒃᖢᓂ ᑎᑭᐅᑎᔪᓐᓇᕋᓗᐊᖅᖢᓂ ᐊᕐᕌᒍᓄᑦ 100ᓄᑦ.
ᖃᖓᔅᓱᒪᓂᒃᑲᓐᓂᖅ, ᐃᒃᓯᓐᓇᖅᑕᐅᑐᐃᓐᓇᑦᑎᐊᖅᐸᓚᐅᕐᒪᑕ ᐅᔭᕋᖕᓂᐊᕐᕕᐅᔪᑦ ᓴᓗᒻᒪᖅᓴᖅᑕᐅᔾᔫᒥᒋᐊᕋᑎᒃ, ᒪᑐᔭᐅᓂᒃᓴᖓᓄᑦ ᐱᕙᒌᔭᕋᓱᓯᒋᐊᕌᖓᒥᒃ ᐅᔭᕋᖕᓂᐊᕌᓂᒃᑳᖓᒥᒃ ᑭᓯᐊᓂ ᑲᒪᓱᒐᓱᓯᑕᐃᓐᓇᖅᐸᒃᖢᑎᒃ.
ᐅᓪᓗᒥᐅᓕᖅᑐᕐᓂ ᐅᔭᕋᖕᓂᐊᕐᕖᑦ ᐱᕙᒌᔭᖅᐸᓪᓕᐊᓇᓱᓯᑲᐅᑎᒋᕙᓕᕐᒪᑕ ᒪᑐᔭᐅᓂᒃᓴᖓᓄ ᓴᓇᔭᐅᕙᓪᓕᐊᓕᓚᐅᖅᑳᖅᑎᓐᓇᒍᓘᓐᓃᑦ, ᓈᒻᒪᖕᓂᖅᓴᓂᒃ ᓇᓂᓯᔪᓐᓇᐅᑕᐅᓂᖅᓴᐅᓇᔭᖅᖢᓂ ᐅᔭᕋᖕᓂᐊᓱᖓᖅᑎᓪᓗᒋᑦ ᐃᓚᒋᔭᐅᓪᓗᓂ ᐋᖅᑭᐅᒪᓂᖃᕐᓂᖅᓴᐅᔪᒥᒃ ᓅᑎᕆᑕᕐᓂᕐᒥᒃ.
ᓄᓇᐅᑉ ᐅᑎᖅᑎᐅᕋᖅᑎᑕᐅᓂᖓ, ᐃᓂᒋᔭᖅ ᖃᓄᐃᓕᖓᓂᕆᓚᐅᖅᑕᖓᓄᑦ ᐅᑎᖅᑎᖦᖢᒍ ᐅᔭᕋᒃᑕᕐᕕᐅᔪᓐᓃᖅᐸᑦ ᐅᔭᕋᖕᓂᐊᕐᕕᒋᔭᖃᖅᑐᑦ ᐱᓂᐊᕐᓂᕆᔭᓪᓗᐊᑕᕆᕚᑦ ᐊᕙᑎᒋᔭᕐᒥᒃ ᓴᐳᒻᒥᔭᖃᕐᓂᕐᒧᑦ.